Centeares de persoas na festa o pasado fin de semana.

O goberno local agradece o respaldo social a un evento que buscaba, sobre todo, homenaxear ao sector pesqueiro de Vilaboa

Máis de 2.000 persoas participaron durante a fin de semana nos diferentes actos organizados no marco da I Festa do Mar no porto de San Adrián de Cobres, un evento no que as cifras avalan a satisfacción do goberno local polo respaldo social a un evento que buscaba, sobre todo, homenaxear ao sector do mar de Vilaboa. Durante as dúas xornadas despacháronse 1.272 racións (383 de mexillón, 570 de choco e 289 de ameixa) facendo que nalgún turno os restaurantes quedaran sen suministro tendo que volver a encender os fogóns para cociñar pratos que tiveron moita demanda tanto ao mediodía como á noite. A facturación da venta das tapas superou os 6.000 euros.

No concurso de catas, o premio ao Mellor Sabor foi para A Garboa; o premio á Mellor Presentación levouno Restaurante Mauro e o premio á Innovación para A Casa de Rosa da Mazaroca.

Se a parte gastronómica conseguiu un éxito rotundo, a cultural e didáctica non quedou atrás. Un dos momentos máis concurridos da fin de semana foi o macroconcerto protagonizado pola Escola de Música de Vilaboa para celebrar o seu X aniversario.

Cargado de emotividade e unha sensación colectiva de “orgullo da nosa música”, a actuación arrincou sonoros aplausos e os asistentes disfrutaron dunha velada apaixoante da man dos profesionais da Banda de Música de Vilaboa xunto a Paco Lodeiro, Rosa Cedrón, e Miguel Ladrón.

O alcalde, no centro, durante un momento da entrega dos premios.

Terapia de Grupo e o grupo de gaitas “Aires de Cobres”, cada un no seu estilo, convenceron ao público asistente. O grupo folclórico local fixo “doblete”, cun pasarrúas pola mañán e unha actuación a mediodía para amenizar o xantar. O programa incluía un obradoiro de esmaltado ao lume impartido pola ourivre local Pilar Blanco. As dez prazas ofertadas cubrironse en tan so tres horas e o Concello habilitou un segundo obradoiro que tamén se completou. Pilar Blanco elaborou unhas pezas con metais e cunchas marinas a propósito para a Festa do Mar que sorprenderon e agradaron a moitos dos asistentes.

A Festa contou tamén cun Punto Violeta ao que se achegaron, sobre todo o sábado pola noite, moita mocidade en busca de información.

E outra das propostas moi concurridas foi a exposición do GALP, con imaxes antigas de persoas vencelladas ao sector do mar; as fotografías reactivaron recordos das persoas con máis idade de Vilaboa, que recoñeceron a veciños e veciñas e identificaron os cambios na contorna.

A concelleira de Promoción Económica, Carmen Gallego, agradece a resposta da cidadanía a unha Festa que pon en valor o produto extraído das augas de Vilaboa por mariscadoras e bateeiros, un sector que padeceu de xeito especial as consecuencias da crise sanitaria do Covid 19.

Agora o goberno local comeza xa traballar na Festa do Viño, que terá lugar a finais do mes de xullo en Riomaior.

DEJA UNA RESPUESTA

Por favor ingrese su comentario!
Por favor ingrese su nombre aquí