Espérase unha media de afluencia de 3.000 persoas a esta festa do terror e da diversión na Finca de Briz
O terror, a diversión e a tradición da noite de Defuntos volverá por todo o alto este ano, cunha nova edición do Samaín Briz, presentada na Finca de Briz pola concelleira, Marián Sanmartín, e membros das entidades colaboradoras na súa organización.
Tal e como explicou a concelleira, “convertiremos de novo a Finca de Briz nun auténtico parque temático do Samaín”, e espérase que haxa unha afluencia de cerca de 3.000 persoas, para o cal “elaboraremos un plan específico de seguridade”.
Non será preciso reservar entrada previa, xa que o acceso será gratuíto a partir de media tarde, cando se realice a apertura de portas. Haberá dúas rutas moi potentes: unha organizada a cargo de Os da Caña e outra polo Club de Fútbol da Peña e o alumnado do Ciclo superior en Ensinanza e animación sociodeportiva (TSEAS) “Desta vez”, explicou a concelleira, “quixemos apostar por só dúas rutas, pero que sexan intensas, cheas de sustos e de experiencias e moi ben ambientadas”.
Ademais, haberá postos de venda de comida e bebida e animación ao longo de todo o espazo, no que haberá música, decoración e moitos sustos desperdigados, así como unha traca final, cun espectáculo que pechará unha velada emocionante.