Os veciños levaron a cabo onte unha protesta, coincidindo co operativo da Garda Civil e da Policía Local
A concentración veciñal que levou a cabo ao mediodía de onte na PO-551, no cruzamento cara a Means, en Bueu, e o dispositivo despregado pola Garda Civil e a Policía Local deixou como resultado a detención dunha parella acusada dos delitos de roubo con forza e tráfico de drogas, informa a Garda Civil. Trátase de Juan J.G., de 24 anos, e a súa compañeira sentimental. Esta mañá o xulgado de Marín 2 deixounos en liberdade. Ela investigada por un delito de furto de uso de vehículo de motor, el por dous delitos iguais ao mencionado, outro de furto e outro de condución sen carné
Ambos residían nunha vivenda en Meáns e ata alí desprazáronse os axentes e os bombeiros do Morrazo, que foron os encargados de abrir a porta para que a Garda Civil accedese ao interior do piso e detivese a Juan. Mentres tanto, a estrada autonómica permanecía cortada ao tráfico pola mobilización levada a cabo por unha vintena de veciños que decidiron organizarse ante os continuos roubos perpetrados presuntamente por estes dous mozos. De feito, xa colocaran antes fotografías deles nos farois advertindo da súa conflitividade e acusándolos de «ladróns». Esta foi a palabra máis sonada na protesta de onte.