O malestar entre a comunidade escolar de Moaña pola mala calidade dos menús que cada día consomen os nenos de infantil e primaria de todos os centros escolares da localidade, a excepción do Ceip Reibón que conta con cociña propia, obrigou á Xunta a reaccionar un ano despois de que comezasen as queixas. Precisamente, en outubro de 2021 xa se presentou unha moción no pleno pedindo unha mellora da comida.
Durante todo este tempo non houbo ningún cambio e, mesmo, a situación agravouse e os pratos foron empeorando. Por tanto, o tema volveu onte ao pleno e, ademais, cos pais abarrotando o salón. XM, PSdeG e BNG presentaron unha moción instando á Xunta a dar solución a este problema que o propio grupo municipal popular, que tamén apoiou o escrito, cualificou de «real» e para o que pediu unha «solución rápida» por parte da Consellería de Educación.
Precisamente, os populares anunciaron que a xefatura provincial de Educación confirmáralles que nos próximos días levarán a cabo auditorías á empresa de catering, Alimentación Saludable Gallega, que poderían desembocar en sancións ou, mesmo, na rescisión do contrato.
Aínda que houbo unión de toda a corporación neste tema, os tres partidos que impulsaron a moción reprocharon ao PP non sumarse dende o inicio para poder levar a queixa como declaración institucional.