A deputada socialista Leticia Gallego visitou hoxe o centro de saúde da rúa Concepción Areal para denunciar a situación «insoportable» que viven os veciños en Atención Primaria
O PSdeG de Moaña, a través da súa parlamentaria socialista Leticia Gallego, levará ao Parlamento unha iniciativa para reclamarlle á Xunta que reabra o servizo de Urxencias na Casa do Mar de Moaña e que cubra a baixa de Pediatría que ten deixado ao municipio sen este servizo. Gallego visitou hoxe o Centro de Saúde xunto co secretario xeral dos socialistas moañeses, Mario Rodríguez, onde presentou unha serie de iniciativas parlamentarias sobre a situación da sanidade na localidade.
A responsable socialista considera “insoportable” que o goberno galego a día de hoxe manteña o servizo de urxencias de Moaña desprazado a Cangas, precisamente cando a Xunta está a anunciar o camiño cara á nova normalidade logo da sexta ola da pandemia. Leticia Gallego advirte de que os veciños e veciñas da localidade “non comprenden que nesta vila continúen sen urxencias médicas e sen recuperar o nivel de consultas presenciais anteriores á pandemia, ademais de soportar atrasos moi importantes nas citas de Atención Primaria”. A parlamentaria socialista leva ao Parlamento unha serie de iniciativas parlamentarias para reclamar o reforzo do persoal de Atención Primaria.
Pediatría
Gallego reclama tamén a cobertura urxente da baixa da pediatras que ten deixado ao servizo desatendido nesta localidade. Alertou ademais de que o servizo leva tres xornadas desatendido por canto a Xunta deixou sen cubrir os días libres da única pediatra en servizo, que xustamente estaba a traballar en solitario dende a baixa da outra pediatra, tamén sen ser cuberta dende finais de febeiro.
Alerta das graves consecuencias da falla de persoal para a poboación de Moaña, ata o punto de que o persoal administrativo ten serios problemas para conceder citas ás familias que o precisan e mesmo teñen solicitado instrucións para derivar as urxencias pediátricas a outras localidades.
A responsable socialista sinala que a situación de pediatría replícase no resto de servizos sanitarios deste Centro de Saúde, por canto o goberno galego ten deixado desatendidas as necesidades de persoal. Así, dende decembro, a consecuencia do concurso de traslados dos facultativos, a quenda de tarde só conta con dous médicos dos catro que ten asignados.
O Grupo Socialista presentará por iso esta iniciativa parlamentaria, na que reivindican unha “correcta e plena asistencia na atención primaria” cubrindo as vacantes da quenda de tarde, así como dotar dunha ambulancia de reforzo na comarca do Morrazo “para ter unha boa asistencia sanitaria».