Xa comezaron os traballos de ampliación da beirarrúa pegada á Renault e instalaranse tamén dous pasos de peóns elevados na estrada de baixada do CEIP da Laxe
A mazá urbana que engloba toda a zona da República Arxentina, Inferniño e a Rúa Quevedo experimentou diversos cambios nos últimos anos grazas ao progreso de obras que cambiaron a súa fisionomía e viñeron a mellorar parte dos servizos desta zona. Por unha banda, habilitáronse na parte máis alta da República Arxentina, case fronte ao CEIP da Laxe, dúas bolsas de aparcadoiro público gratuito, á que posteriormente se uniu a creación doutra bolsa similar na Rúa Quevedo e o de
Inferniño.
Por outro lado, abriuse a nova rúa Travesía República Arxentina, coa que se conseguiu tumbar un muro que separaba estas dúas mazás urbanas e que viu revitalizar a toda a zona. Finalmente, o desenvolvemento da parcela que se atopaba en desuso e que agora ocupa o novo Mercadona tamén axudou ao cambio na fisionomía e no tráfico desta zona, un tema que foi tratando en varias reunións por parte do Goberno local coa veciñanza da zona.
Precisamente, seguindo as súas demandas e co obxectivo de seguir mellorando toda esta zona, que ganou en servizos nos últimos tempos, o Concello está a executar algunhas das medidas correctoras máis urxentes para garantir unha mellora da mobilidade e da seguridade viaria nun entorno no que cada vez hai máis vida.
Estas medidas concrétanse no ancheamento da beirarrúa que vai pegada ao concesionario Renault, onde os operarios da brigada municipal xa están traballando. O obxectivo é que poidan transitar os peóns con maior comodidade. No que respecta á seguridade viaria, tamén serán instalados dous pasos de peóns elevados na calzada da estrada que baixa desde o CEIP da Laxe, na Rúa República Arxentina, para calmar o tráfico e mellorar a súa xestión.
Ademais, fontes do Goberno local adiantan que se encargará un estudo da mobilidade nesa zona, tal e como se aprobou no Pleno da Corporación, pero estas medidas, comentadas e demandadas pola veciñanza xa se quixeron impulsar para mellorar o espazo na maior brevidade posible.