Centro de saúde de Vilaboa.

Alberto Acuña aclara que rexeitaron unha moción do BNG “porque era unha moción totalmente partidista, e que nada ten que ver coa situación actual da sanidade no concello”

O Partido Popular de Vilaboa amosa a súa satisfacción porque o Centro de Saúde mellora a atención primaria coa recuperación de dous médicos para cubrir as prazas que quedaron vacantes tras a xubilación de dous facultativos. O voceiro Alberto Acuña explica que, tras unha situación complicada provocada pola dificultade que hai a nivel nacional para cubrir as prazas que quedan vacantes, e
despois de manter varios contactos con responsables de Sanidade para trasladarlles as preocupacións dos veciños e interesarse pola situación, a Xerencia da Área de Sanidade de Pontevedra xa reforzou a asistencia sanitaria en Vilaboa coa incorporación dun facultativo con praza en propiedade e outro médico que estará tres días a tempo completo mentres non se asigne a praza.

Acuña, ademais, tamén lamenta as acusacións do BNG nas que o acusan de ser favorable ao desmantelamento da sanidade en Vilaboa por non apoiar unha moción política, e totalmente allea á actual situación da sanidade no noso concellos. Nesta liña, o popular di que “mentres outros usan a sanidade para facer política e demagoxia, o PP estivo traballando e interesándose pola situación no centro de saúde”.

Tampoco é certo, din os populares, que os cupos estean sobrepasados, e refírese
que no caso de Vilaboa o maior cupo está en 1.270 pacientes por médico, por debaixo das 1.500 tarxetas por médico que recomenda non sobrepasar o Ministerio de Sanidade. “Vendo esta situación, non podemos falar de recortes nin desmantelamentos, non se pode utilizar a sanidade dos veciños deste xeito. É lamentable facer política cun asunto tan serio”.

Ademais, lamenta que nesa moción “partidista e política”, non se incluíse a problemática real que hai actualmente coa atención primaria e que precisa dunha solución do Goberno central para facilitar a cobertura do persoal médico nos Centros de Saúde, e que pasa por eliminar a taxa de reposición de efectivos que permitiría ofertar máis prazas en próximas convocatorias anuais de oferta de emprego público.

DEJA UNA RESPUESTA

Por favor ingrese su comentario!
Por favor ingrese su nombre aquí