De novo, haberá tres categorías: comercio, hostalaría e vivendas, e haberá dous premios en cada unha, ademais dun sorteo entre os participantes
A vila de Marín volverá contaxiarse do espírito do Nadal grazas á decoración. Despois do éxito do pasado ano, o Concello volve convocar o II Concurso de Decoración do Nadal, co obxecto de fomentar a participación cidadá no embelecemento e ornamentación da vila, facendo cómplices a comerciantes, hostalaría e veciñanza.
“Despois da boa resposta que tivo esta iniciativa o ano pasado, decidimos volver convocar aos veciños, comerciantes e a todas aquelas persoas que queiran participar a decorar a nosa vila”, explican desde o Concello.
Para poder participar, será preciso ter a decoración exposta desde o 10 de decembro de 2021 ata o 6 de xaneiro de 2022. Establécense tres categorías:
● COMERCIO: Valorarase en conxunto o mellor escaparate e interior dos comercios e negocios participantes, que terán que estar ubicados no termo
municipal.
● HOSTALARÍA: Valorarase tamén a mellor entrada e interior do establecemento, tendo en conta tamén ventanais. Só poderán participar locais ubicados no termo municipal.
● VIVENDAS: Establécense dúas modalidades dentro desta categoría.
● Comunidades de veciños: deberán decorar as entradas principais dos seus edificios e que esas decoracións sexan totalmente visibles dende a vía pública.
● Vivendas unifamiliares: de novo, a decoración tanto de fachadas como xardíns que sexan visibles dende a vía pública.
Haberá que usar elementos decorativos tradicionais do Nadal e os obxectos de venda que se atopen nos escaparates poderán ser cambiados, sempre que non se modifique a decoración que concursa.
Inscricións
O prazo de inscrición xa está aberto e finalizará o día 10 de decembro. Para participar, será preciso encher o anexo que se poderá encontrar na páxina web do Concello (www.concellodemarin.es) ou no Rexistro municipal. O anexo cumplimentado poderá presentarse igualmente de novo ou no rexistro ou a
través da sede electrónica.
Premios
En todas as categorías, haberá un primeiro premio de 300 euros e un segundo de
200 euros. Ademais, farase un sorteo entre todos os participantes (a excepción
dos gañadores) por valor de 100 euros.
O xurado estará composto pola alcaldesa do Concello de Marín ou a persoa na que delegue, un representante da Concellaría de Festas, outro da de Cultura e outro da de Comercio, un funcionario municipal e representantes veciñais de Marín.
Valorarase que os adornos conteñan motivos alusivos ás festas, que haxa boa iluminación (preferentemente LED), a orixinalidade e a singularidade e a utilización de material reciclado.
O fallo do xurado realizarase o luns 28 de decembro.