Javier Carro, diante do anexo do pavillón da Xunqueira.

As ANPAS e as direccións dos Ceips Seara e Reibón de Moaña están indignados ante a última decisión tomada polo goberno local de denegarlles o anexo do pavillón da Xunqueira para realizar algunhas das actividades extraescolares que teñen previsto ofrecer ás familias para axudarlles na conciliación familiar durante o próximo curso e que, de non poder facer uso destas instalacións, terán que eliminar do seu calendario por falta de espazo.

O cumprimento da normativa Covid e a necesidade de distancia social obriga ao profesorado para dispoñer de maior espazo que antes da pandemia, polo que se pensou en solicitar este anexo ao Concello, como entidade propietaria e responsable do edificio, ao permanecer baleiro durante as horas en que se impartirían as actividades extraescolares.

Tanto para os pais como para os centros, esta é unha decisión «inxusta» e «sectaria» da concelleira de Educación, Dolores Chapela, e da propia alcaldesa, Leticia Santos, para beneficiar a un club deportivo que o utiliza en exclusiva en prexuízo do resto da familias. A través de varios escritos, ANPAS e direccións dos centros trasladaron o seu malestar ao bipartito e lémbranlle que «as instalacións se construíron co diñeiro de todos os moañeses para beneficio de todos os veciños e non só dun club».

Carro esixe unha rectificación

Tamén o fixo o portavoz de Coalición Independente X Moaña (XM), Javier Carro, que tras recoller as queixas dos pais foi moi crítico na comisión informativa do martes coa decisión do bipartito e instou a edil de Educación a dar marcha atrás canto antes e autorizar o uso das instalacións para evitar que se retrase todavía máis o inicio das clases e, polo tanto, a conciliación das familias.

«O deste goberno local non ten nome, aínda que se lles enche a boca falando
de conciliación danlles absolutamente igual as familias de Moaña, só lles importa
quedar ben cos seus amigos», critica Carro.

Deja una respuesta

Tu dirección de correo electrónico no será publicada. Los campos obligatorios están marcados con *