Portos de Galicia ven de iniciar as obras de reforma do pantalán número 1 do peirao de Bueu, destinado ao amarre da frota profesional da localidade. O ente dependente da Consellería do Mar inviste máis de 23.000 euros nesta actuación, que conta cun prazo de execución previsto de dous meses.
O obxecto dos traballos é adaptar as prazas de amarre ás dimensións actuais das embarcacións que utilizan esta infraestrutura, de maior envergadura que aquelas para as que foi deseñado o pantalán no seu momento. Esta reforma dará resposta ás necesidades trasladadas polo sector pesqueiro local e nomeadamente pola confraría de pescadores de Bueu.
As obras consistirán en desmontar os dous fingers existentes na punta do pantalán e recortar os pilotes asociados. Ademais, instalaranse dous novos pilotes e recolocaranse os dous fingers xunto cun módulo novo de pantalán, formando un martelo de maior lonxitude que o existente ata o momento e desprazado dous metros cara a fóra.