Fernández-Tapias cos alumnos que remataron o curso.

A delegada territorial, acompañada da alcaldesa Victoria Portas, entregou os diplomas desta iniciativa laboral na que se formaron 20 cangueses, e que contou cun investimento de 347.000 euros do Executivo autonómico

A delegada territorial da Xunta en Vigo, Marta Fernández- Tapias, clausurou este xoves xunto á alcaldesa de Cangas, Victoria Portas, o obradoiro de emprego de formato dual Granxa da Rúa X, no que se ofreceu formación e traballo a 20 persoas desempregadas durante os últimos nove meses, e que contou cun investimento de 347.000 euros do Executivo autonómico.

Durante o acto de entrega de diplomas celebrado nas dependencias de protección civil do concello, a representante autonómica incidiu no obxectivo fixado de incrementar as oportunidades laborais dos galegos e galegas e mellorar a empregabilidade das persoas participantes, ofrecéndolles unha formación para o emprego teórica e práctica de calidade.

No caso concreto de Granxa da Rúa X, os participantes recibiron formación en actividades auxiliares de conservación e mellora de montes, repoboación forestal e tratamentos silvícolas e operacións de vixilancia e extinción de incendios forestais e apoio a continxencias no medio natural e rural. Actuacións todas elas que se desenvolveron en distintos terreos forestais propiedade dalgunha das tres mancomunidades de montes de Cangas, nas parroquias de Coiro, Darbo e Hío.

Fernández-Tapias destacou así a dobre dimensión dos programas formativos activados pola Consellería de Promoción do Emprego e Igualdade, e nomeadamente dos obradoiros duais, cunha “pegada tanxible na propia contorna” e un alto nivel de inserción laboral de preto do 60%. “ “Experiencias formativas que teñen en conta a realidade social e económica de Galicia, adaptándose á demanda das empresas da contorna”, dixo, ao tempo no que salientou a simbiose entre formación e emprego como fórmula de éxito. Especial énfase puxo en que se trata dun programa orientado á xente sen traballo “co que reciben unha remuneración durante nove meses ao tempo no que contribúen ao beneficio colectivo de todas e todos con obras públicas e atencións sociais a través das prácticas deste plan formativo”.

A delegada territorial recordou que na área territorial de Vigo estanse a formar 252 persoas a través de catorce obradoiros de emprego en 11 concellos que supuxeron un investimento autonómico de 4,8 millóns de euros, colaborando coas entidades locais galegas para incrementar o emprego nos concellos.

Os obradoiros duais son o Coidando Miñor, que Gondomar comparte con Nigrán e Baiona; o taller Sustentable que promoven Salceda de Caselas e Salvaterra de Miño; o Granxa da Rúa de Cangas; o Labora V de Moaña; a segunda edición do Redondela Máis que Bela; o obradoiro Porriño Labora; a nova convocatoria do Vigo Capacita; o Somos Mos; e o obradoiro forestal nos montes vigueses a cargo da Mancomunidade.

Tal que como lembrou a delegada territorial, estes obradoiros duais súmanse aos cinco para persoas mozas nos concellos de Vigo (2), Redondela, Moaña e o Val Miñor. Neste caso, os participantes, ademais de recibir formación de calidade, contan cun contrato de traballo de 12 meses de duración.

DEJA UNA RESPUESTA

Por favor ingrese su comentario!
Por favor ingrese su nombre aquí