A deputada María Ortega.

Serán todos os mércores dende o 13 de outubro e ata o 3 de novembro nos centros socioculturais de Tirán, Castelao, de Domaio e de Verducedo

A Deputación, grazas ao seu programa de Memoria Histórica ‘O Pasado Por
Vir’, vai encher de actividades e contido as xornadas ‘A represión das
mulleres no Franquismo’ organizadas pola Asociación Cultural Irmandade do
Dolmen en Moaña. O departamento dirixido pola nacionalista María Ortega
financiará a celebración de tres charlas e unha peza teatral abertas ao
público que se desenvolverán cada mércores dende o 13 de outubro ata o 3
de novembro nos centros socioculturais de Tirán, o centro Daniel Castelao, e
os de Domaio e Verducedo.

A deputada María Ortega explica que as actividades que a Deputación leva
a Moaña están dispoñibles no catálogo de actos e iniciativas ofertado ás
asociacións memorialistas e concellos da provincia co obxectivo de situar a
memoria histórica no centro do debate. Apunta que ’O Pasado Por Vir’ é un
programa plurianual que pretende reivindicar as ideas transformadoras que
estaban vixentes antes do golpe de Estado do 1936 e recoñecer “a herdanza
dunha xeración única e irrepetíbel e transmitir a idea que aínda que coa
represión e a ditadura se arrasaron os proxectos de modernidade e mesmo
se aniquilaron as persoas, as súas ideas e legado seguen vivos”.

No catálogo da Deputación inclúense proxeccións do documental ‘Acorda’ e
a exposición fotográfica sobre ‘como se fixo’ a peza audiovisual nos lugares
de memoria da provincia, teatro, obradoiros, e charlas e coloquios. A
Irmandade do Dolmen, no caso de Moaña, solicitou tres charlas vencelladas
á represión e ás mulleres, así tomo tamén a peza teatral ‘A señora de
Forcadela’ representada por Os Quinquilláns.

A primeira xornada de memoria histórica será o mércores 13 de outubro ás
19,30 horas no centro sociocultural Castrovello de Tirán, onde a a docente
Lola Varela falará de ‘Mulleres e represión franquista na Terra de Montes’,
facendo ver as diferentes facianas do sufrimento soportado por elas a causa
da súa ideoloxía disidente ou dos membros das súas familias, ao seren
levadas ao cárcere, ao exilio, a ser torturadas, extorsionadas
economicamente e, nalgún caso, a ser tratado o seu corpo como botín de
guerra.

O mércores 20 de outubro ás 19,30h no auditorio do centro social Daniel
Castelao interpretarase a peza teatral ‘A señora de Forcadela’, unha historia baseada na biografía de Josefa García Segret e doutras mulleres represaliadas na Galiza a partir de xullo do 36.

O mércores 27 de outubro, á mesma hora, e no centro Rosalía de Castro de
Domaio, falará a escritora Montse Fajardo coa charla ‘A loita das mulleres no
século XX: cen anos de conquistas e represión’, que versará sobre como
nos albores do século XX houbo un tempo novo para as mulleres que foi
truncado polo golpe e obrigou ás pioneiras a batallar de novo contra unha
ditadura que as devolvía ao ámbito do privado. A charla fai un repaso por
cen anos de historia das galegas desde o agrarismo de finais do século XIX
ata a loita en prol da democracia na que estiveron inmersas moitas mulleres
ata ben entrados os anos oitenta do século XX.

Finalmente, o mércores 3 de novembro ás 19,30h., no centro sociocultural
de Verducedo estará a historiadora María Victoria Martíns, que disertará
sobre ‘A muller de Moaña na ditadura franquista’.

Deja una respuesta

Tu dirección de correo electrónico no será publicada. Los campos obligatorios están marcados con *