A sección cuarta da Audiencia Provincial de Pontevedra, de acordo co veredicto de culpabilidade emitido polo Tribunal do Xurado, condenou a unha funcionaria do Concello do Porriño por cometer, entre maio de 2016 e decembro de 2017, un delito continuado de malversación de fondos públicos, na súa modalidade de apropiación indebida de menor entidade, a un ano e medio de cárcere, así como ao pagamento dunha multa de 1.356 euros. Ademais, inhabilitouna durante tres anos para o exercicio de cargo ou emprego público e impúxolle o abono dunha indemnización ao concello de 1.270 euros (importe total do apropiado) polo prexuízo causado.
Na sentenza, contra a que cabe presentar recurso ante o TSXG, a Audiencia explica que existe “proba de cargo, suficiente e bastante” de que a acusada, que exercía como animadora socio-cultural, quedou “co diñeiro entregado pola Banda de Música Cultural de Arcade, pola Banda Municipal de Redondela e pola Agrupación Musical Lembranzas Moañesas, tentándoo, igualmente, coa Agrupación Musical O Rosal, cartos que, en todos os casos, pertencían ao Concello do Porriño e que debería ingresar nas arcas municipais”.
A Audiencia indica que non foi discutido o feito de que as actuacións musicais coas catro agrupacións se contrataron a través da acusada, “facendo o concello o pago total das facturas correspondentes por cada actuación musical”. Os grupos, segundo o fallo, asumiron o compromiso de devolver á administración local o importe da subvención solicitada á Deputación de Pontevedra en caso de que lles fose concedida, como así sucedeu. Unha vez recibidas as axudas, segundo a sentenza, as distintas agrupacións volveron contactar coa acusada para facer a devolución dese importe ao concello, pero nunca foi reintegrado ás arcas públicas.
“Os membros do Xurado non atoparon crible o erro alegado pola acusada no momento de proporcionar o número de conta persoal e non o do concello, aludindo ao erro no curta-pega, xa que é reiterado e en diversos momentos”, subliña a maxistrada presidenta na resolución, na que indica que tampouco consideraron crible a afirmación “relativa a que fixo entrega do diñeiro recibido en man das agrupacións musicais á falecida alcaldesa do Porriño”, pois entenderon que “non hai elemento que o xustifique, nin material nin persoal”, así como que resulta unha manifestación “pouco verosímil, xa que non foi alegada na súa declaración inicial, reacción lóxica ante unha acusación de apropiación de cartos”.
A Audiencia Provincial de Pontevedra destaca que a actuación da condenada foi “eminentemente dolosa, con plena conciencia e vontade do que facía”. En canto a ter en conta a atenuante de reparación do dano, solicitada pola defensa, a maxistrada presidenta sinala que o Xurado declarou probado que a acusada consignou na conta do xulgado o importe de 1.270 euros coa esperanza de que, ao finalizar o xuízo, llo devolvesen. Así, declarou non probado que a cantidade depositada pola acusada na conta de consignacións fora coa finalidade de reparar o dano causado e de que dita cantidade fora entregada ao concello. “Razoaron, na súa función soberana, que non se discutía a existencia mesma da consignación, pero, ao seu xuízo, o que non quedaba acreditado é a finalidade reparadora”, explica a maxistrada, á vez que recalca que iso conleva “a imposibilidade de aplicar o tipo privilexiado interesado pola defensa”.