Unha ambulancia do 061 ás portas da base de Moaña.

Representantes dos traballadores do servizo de emerxencias na comarca do Morrazo reuníronse onte coa alcaldesa de Moaña, Leticia Santos, para pedirlle a súa colaboración tras o último informe médico emitido por 061 no que asegura que non é necesario reforzar a asistencia sanitaria cunha ambulancia máis alegando que «a ambulancia de Cangas e Moaña non aumentou demasiado a súa actividade».

Un informe que desde a Cig critican ao consideralo parcial debido a que nel a administración autonómica «non entra a valorar» os servizos que teñen que ser atendidos por ambulancias de fóra de Cangas e Moaña e, mesmo, doutros municipios da área de Vigo porque as da comarca morracense atópanse ocupadas co risco que iso supón para a saúde do enfermo ou enferma ao aumentar o tempo de espera. Algo que sucede con demasiada frecuencia e que levou, por exemplo este verán, á desprazar vehículos mesmo desde Porriño para atender a un afogado na Xunqueira porque as ambulancias de Cangas, Moaña e Bueu atopábanse noutros servizos no momento da emerxencia.

A incorporación dunha ambulancia de reforzo na comarca supoñería unha mellora do servizo de atención ás emerxencias, por tanto, unha redución dos tempos de espera e facilitaría aos profesionais sanitarios do PAC de Cangas os desprazamentos ás emerxencias e aos domicilios que agora realizan nos seus propios vehículos ou en taxi. En moitas ocasións desde o centro sanitario teñen que recorrer a Protección Civil de Cangas para poder chegar a tempo a atender as emerxencias pola falta de medios para desprazarse.

Así, na reunión os representantes sindicais entregaron á rexedora unha listaxe con preguntas crave que Leticia Santos comprométese a trasladar de forma oficial á dirección do 061 para «obrigarlles» a responder a elas con datos e «tratar de esclarecer a verdadeira situación da atención sanitaria de emerxencias na comarca do Morrazo».

Santos comprometese a «trasladar as preguntas propostas e posiblemente algunhas máis, somos conscientes de que o servizo de ambulancias asistencias é moi escaso, iso fai que en ocasións a nosa veciñanza teña que agardar un tempo de espera por unha ambulancia que non é o axeitado. Xa vivimos esperas tan elevadas que puxeron en risco ás persoas. Isto agravase pola falta de urxencias en Moaña, así que desde o Concello seguimos a esixir a súa volta e o reforzo das ambulancias».

Deja una respuesta

Tu dirección de correo electrónico no será publicada. Los campos obligatorios están marcados con *