A parroquia de Darbo atrasa o calendario catro décadas para mergullarse nos guateques dos anos 70, 80 e 90. Nace o «Darbo Ye-Yé», unha iniciativa festiva que terá lugar este sábado no adro e que ten dous obxectivos fundamentais. O primeiro, e fundamental, «darlle vida a toda a contorna» porque «é unha pena que este sitio só gócese catro días ao ano». O segundo fin, «recadar fondos» para sufragar o custo das festas patronais» desta parroquia, que terán lugar en setembro. Así o explicaba o presidente da Asociación Tradicional Romaría de Darbo, Constante Soliño, na presentación da festa no Concello, onde recoñeceu que cada día é máis difícil pedir aos veciños» e necesitan reinventarse para poñer en marcha outras formas de obter ingresos.
E para que o guateque sexa cento por cento, animan ao público a asistir «vestidos como naquela época». É dicir, hai que sacar o pantalón de campá, as hombreras e deixarse tupé e patillas… Pero sobre todo, ir coas mesmas ganas de divertirse, coma se non pasase o tempo. E para os máis mozos e mozas, toca desempoar o baúl familiar para vivir unha serán de cor e ritmos ochenteros.
O ambiente musical comezará ás 17:00 horas e unha hora despois hai organizada unha concentración de coches clásicos. Moitos deles viaxarán desde O Grove ata Cangas, ainda que esta exposición está aberta a todo aquel que conte cun vehículo destas características. Ao terminar, o excomponente de orquestra Panorama, Roberto, animará o Ye-Yé ata a actuación do grupo «La sombra de Justin» e as posteriores sesións DJ´s ao redor das 23:00 horas. Tamén se instalarán inchables para os máis pequenos.
Aínda que a idea xurdiu entre compañeiros e pedindo colaboración «de amigo a amigo», o Darbo Ye-Yé xa nace para quedar. «O ano que vén esperamos facelo aínda mellor», avanzou Soliño. Pola súa banda, tanto a edil de Cultura, Aurora Prieto, como a alcaldesa, Araceli Gestido, cualificaron a iniciativa de «moi boa» e agardaron «moitos éxito» para esta primeira edición.