O goberno local leva ao pleno un orzamento de 4.406.299 euros centrado na protección social e na dinamización económica do municipio
O goberno local de Vilaboa presentará ao pleno de hoxe un orzamento histórico que cun montante de 4.406.299 euros o que supón un incremento do 4,26% con respecto aos 4.226.076 euros do 2024 contribúe á protección social, a dinamización económica e mellora na prestación dos servizos. Así o Concell destina este ano 77.500 euros más ao servizo de atención no fogar, para atender ás persoas dependentes nas súas casas, chegando a partida aos 454.500 euros de gasto total.
O goberno local recorda que é un “importante esforzo económico que hai que poñer en valor tendo en conta que a administración autonómica nin asume as súas competencias, nin asume o custo das mesmas, financiando este servizo moi por debaixo do seu gasto real coa valoración do custe/hora en 12,00 euros, cando a prestación do mesmo se realiza por 20,53 euros”. A esto hai que sumar outros servizos asumidos polo Concello e que son tamén competencia da Xunta de Galicia, como o mantemento do Centro de Saúde ou do colexio do Toural, que ten ensino secundario.
Mantense tamén o transporte á demanda para as vítimas de violencia de xénero e increméntanse as partidas dispostas para o Plan de Igualdade en 3.000 euros respecto ao ano anterior; as actividades culturais en 15.000 euros a maiores e as de promoción económica 20.000 euros por encima do orzado en 2024.
Para dinamizar a actividade económica do Concello, favorecer a promoción de Vilaboa como destino turístico, e fomentar as actividades culturais o Concello destina no orzamento 95.000 euros dedicados ás festas do Mar e do Viño, e á declaración de Festa de Interese Turístico Nacional do Entroido de Cobres, así como á programación cultural anual. As axudas de emerxencia social manteñen o orzamento de 6.000 euros e se volven a convocar as subvencións ao deporte por importe de 25.000 euros. O orzamento inclúe tamén unha subvención mediante o procedemento de concorrencia competitiva para as asociacións veciñais por importe de 5.000 euros.
O pago a SOGAMA polo lixo xerado absorbe unha partida de 160.000 euros, a pesar da decidida aposta municipal pola compostaxe para reducir a factura da xestión dos residuos. Sen embargo, a previsión da suba do canón aos concellos por parte de Sogama obriga a prever este gasto.