A anciá, de 91 anos e con insuficiencia respiratoria grave, sufrira un atragoamento en casa. Á chegada ao hospital tivo que ser sedada e faleceu catro días despois
Unha familia de Cangas denuncia publicamente que a ambulancia de Moaña que acudiu ao domicilio dunha paciente 91 anos que sufrira un atragoamento e que se atopaba con insuficiencia respiratoria grave non se dirixiu directamente ao hospital de Vigo pola autovía do Morrazo, como é habitual e máis rápido, senón que sorprendentemente colleu a PO-551 para parar na base do 061 de Moaña para facer o cambio de quenda.
«A ambulancia recolleunos pero chamoume a atención que vía luces e casas, entón preguntei que onde iamos e contestáronme que tiñamos que ir por alí un segundito. Pouco despois vexo o Spa de Moaña (O Rosal) e pouco despois paran na base. Nese momento dígolles sorprendida que como ían parar que a miña nai estaba a afogarse, ao que unha moza contéstame que lles toca o cambio de quenda e que xa ían agora», explica a Morrazo Noticias María del Carmen M.M., filla da paciente que, finalmente e dada a gravidade, faleceu catro días despois.
«Chega a seguinte quenda e como vin que se estaban leando máis do normal limpando a porta porque había sangue doutra paciente, enganchando a padiola que estaba mal posta e cambiándole a subministración de osixeno, lles fixen alusión a unha familiar próxima que tamén traballa en emerxencias na comarca, e entón entroulles a présa e fómonos a Povisa. Cando chegamos á miña nai tiveron que sedarla e enterrámola o luns pasado», continúa relatando o ocorrido, que cualifica de «vergoñoso non, o seguinte».
Agora, esta familia está a informarse e exponse acudir á vía xudicial.