Con esta decisión dáse cumprimento á proposta que o PP presentou no anterior pleno e que foi aprobada
O pleno do próximo venres 30 de xullo, en principio, aprobará un recoñecemento de crédito por valor de 300.000 euros para que o Concello de Cangas poida pagar as expropiacións de entre 10.000 e 15.000 metros cadrados de terreo na Rúa coa intención de entregarllo ao Sergas e que este levante a infraestrutura sanitaria, ben un CIS ou ou CAR, que aínda está por dirimir. Este é un dos puntos máis importantes da sesión, aínda que non se prevé que sexa o máis quente tendo en conta o consenso en levar a cabo esta habilitación de diñeiro do anterior pleno a proposta do PP.
Onde si está previsto que o debate se endureza será nas mocións presentadas polo Bng e por Avante!. Os nacionalistas piden que se depuren responsabilidades políticas e para iso expoñen a reprobación de todo o equipo de goberno pola súa «irresponsabilidade na desfeita ambiental» coa actuación na Praia de Rodeira e a súa recuperación urxente do espazo.
Pola súa banda, Avante! vai na mesma liña e require o decreto de cesamento de dimisión dos dous edís do PSdeG e da marcha das outras dúas concelleiras posteriormente coa ruptura oficial do pacto de goberno. Con todo, o socialistas non, polo momento, non presentaron ningunha proposta contra a alcaldesa, Victoria Portas, tal e como anunciou para tratar de retirarlle o soldo.