O sacerdote de Domaio, Ángel Tabarés, nun vídeo no seu perfil de Facebook.

Membros da Comisión de Festas reuniranse esta tarde para estudar as acusacións

As declaracións do párroco de Domaio, en Moaña, Anxo Tabarés, fixeron saltar polo aire a aparente boa relación entre os membros da Comisión de Festas e a Igrexa. Segundo explica a Morrazo Noticias, decidiu poñer fin á cesión «cento por cento ilegal» a este colectivo do diñeiro que se recadaba nas capelas porque se facía «baixo unha presión moi forte ao sacerdote, con ameazas e violencia encuberta moi grandes por parte destas persoas que non son da igrexa e que que só queren aproveitarse do diñeiro gratuíto».

Tabarés chegou a Domaio en 2015 en substitución de Samuel Aristizabal, que decidiu non volver da súa viaxe a Colombia tras ser vítima dun acto violento mentres durmía no seu domicilio. Pero este problema podería vir de moito máis atrás. «Era amigo do anterior párroco, Don Xosé Capelo, e daquela cando viña a visitarlle contábame que sufría actos vandálicos contra a súa persoa, que ameazabanlle de morte, con tiralo ao mar», desvela o relixioso, asegurando que isto ocorre tamén noutras parroquias e que «nalgún momento tiña que saltar». «Este sacerdote non vai contribuír ao seu negocio», apostila.

Tabarés, que defende que este diñeiro (3.000 ou 4.000 euros) pertence á parroquia e, di non está disposto a acceder a esta chantaxe , acusa desta «presión» e «ameazas» aos «xefes» de «grupos veciñais» que «non pertencen á igrexa e que se están reunindo para ir contra a miña persoa e facer forza contra ela». «Os veciños de Domaio que si están coa parroquia sábeno e están ao tanto do que ocorre, pero hai moitas persoas que teñen medo a falar», afirma o sacerdote.

Sobre as posibles repercusións sociais e xudiciais que poidan ter as súas palabras, o párroco de Domaio asegura estar tranquilo. «Do único que teño medo é de ofender a Deus», manifesta.

A pesares de todo, Tabarés quere engadir que «este conflicto non é co pobo de Domaio a quen tanto quero e tamén síntome moi querido, se non cos intereses dun home e da súa comisión. Eles non representan o meu querido pobo de Domaio e á súa entrañable xente que son coma miña propia familia»

A Comisión de Festas ten previsto reunirse esta tarde en San Benito para analizar as declaracións do sacerdote e estudar se toman algún tipo de medida legal.

Deja una respuesta

Tu dirección de correo electrónico no será publicada. Los campos obligatorios están marcados con *