Mellorarase a seguridade vial en todo o trazado e canalizaranse as augas pluviais
O Concello de Vilaboa inclúe nas obras a executar este ano 2025 no Plan Máis Provincia o asfaltado dun vial principal e outro secundario na Ramalleira co obxectivo de mellorar a seguridade viaria polo que, na medida do posible, ampliarase a sección da calzada gañando a superficie dalgúns sobreanchos e renovarase a capa de pavimento con extensión dunha nova de aglomerado en quente de 5 centímetros de espesor. A actuación inclúe a sinalización horizontal e vertical executando ademais redutores de velocidade tipo “lomo de asno”.
Os traballos comezarán coa demolición dos pavimentos actuais e a limpeza mecánica e manual das cunetas, o fresado en acceso a vivendas e conexión con outros tramos, a renovación da capa de rodadura e o realce das tapas de rexistro en calzada mediante dado de formigón.
Actuarase tamén no encontro dun camiño municipal coa estrada nacional N-550 coaa renovación da capa de rodadura con aglomerado en quente. Neste punto para a drenaxe das augas pluviais executarase unha reixa de drenaxe transversal que recollerá a auga de escorrentía da chuvia.