O Intercéltico esta fin de semana e, ao seguinte, o gran evento que espera traer a Moaña ao redor de mil persoas durante os catro días (5-8 de agosto) que durará o Encontro de Embarcacións Tradicionais que por primeira vez celébrase na Ría de Vigo e que terá ao municipio morracense como anfitrión do evento.
Un Encontro que forma parte do programa Días de Mar, a través do que o goberno local busca ofrecer actividades culturais diversas para os meses de agosto e setembro nas que os asistentes terán «garantida a seguridade». Así o afirmou a edil de Promoción Económica, Coral Ríos, na presentación do cartel que este ano está dedicado ás traballadoras do mar, as mariscadoras inmortalizadas por Diego Seixo, e ao novo cronista oficial do Concello de Moaña, Manuel Uxío Barreiro.
En representación da Asociación Sueste, Asun Sóñora explicou que, este Encontro, ademais de «reivindicar o patrimonio marítimo que temos do que forman parte as embarcacións» tamén supón «alimentar o espírito» da cidadanía en pandemia. Iso si, «con todas as medidas de seguridade». Prevese que a fachada marítima de Moaña sexa ocupada por 114 barcos, nos que navegarán dúas persoas. Unha instantánea inédita para Moaña sobre o mar pero tamén nas rúas, onde os veciños están convidados a adornar as súas vivendas e establecementos comerciais con símbolos mariñeiros. A organización ten previsto premiar aos mellores tamén cun detalle de produtos, como non, relacionados co mar.
En canto aos concertos incluídos na programación, a situación epidemiolóxica actual obriga a que o público teña que estar sentado. Como máximo o aforo será de 590 persoas e as cadeiras colocaranse en parellas ou unidades de convivencia.
Os protagonistas
Diego Seixo, como fotógrafo, lembrou que inmortalizó ás mariscadoras en plena xornada de traballo un día gris no que abriu a xanela da súa casa e viu que «elas destacaban polas súas cores». «Houbo que meterse no mar e leste foi o resultado», explicou. Pola súa banda, a imaxe que ilustra o Encontro, tamén obra súa, foi realizada nun dos encontros organizados por Sueste aos que sempre é convidado.
Uxío Barreiro, neste caso pon a frase recollida no seu último libro dedicado, precisamente, a estas artesás do mar: “Mulleres senlleiras que residiron en Moaña”. “Manuel Uxío dálle voz nesta obra ás silenciadas, ás prohibidas, ás rebeldes, ás sometidas, ás esquecidas, ás veladas. Lean e imaxinen, como fixen eu, a resposta a tantas preguntas que suscita a vida e obra das protagonistas da outra metade da historia”, son as palabras incluidas no prólogo escrito pola escritora Iria Collazo para a obra de Barreiro.
