Leticia Gallego denuncia o gran malestar que está causando na veciñanza que a vila siga sen urxencias médicas e sen recuperar os índices de atención presencial previos á pandemia
A deputada socialista Leticia Gallego denunciou hoxe o traslado das urxencias de Moaña a Cangas e a implantación da atención médica telefónica. Gallego explica que a medida adoptouse no seu día para centralizar a atención a pacientes con síntomas de covid, pero o seu mantemento “nestes momentos nos que imos cara a nova normalidade está a causar un gran malestar entre a veciñanza”. Nesta liña, tamén lamenta que aínda non se recuperasen “as ratios de consultas presenciais anteriores á pandemia” e que haxa que “soportar atrasos moi importantes nas citas da atención primaria”.
Para corrixir esta situación -e en consonancia coas demandas do grupo municipal socialista en Moaña, encabezado pola tenente de alcaldesa Marta Freire Riobó- o PSdeG vén de presentar unha serie de medidas no Parlamento de Galicia nas que se insta ao goberno galego a restituír, “de maneira inmediata”, as urxencias médicas na Casa do Mar de Moaña “para garantir a correcta e plena asistencia sanitaria dos seus veciños”.
En paralelo, a deputada do PSdeG tamén demanda que se “reforce o persoal da atención primaria para reducir as importantes listas de espera existentes na vila”. Leticia Gallego sinala que, “ante a gravidade da crise da covid, a veciñanza puido entender que se derivase aos posibles doentes de coronavirus a centros de saúde concretos” ou que ante a aparición de síntomas sospeitosos de padecer a enfermidade “se debesen realizar consultas telefónicas previas para valorar o protocolo a seguir”. Porén, agora as circunstancias mudaron, e resulta “incomprensible” que se manteña esta situación.
Leticia Gallego enmarca esta problemática nun escenario global no que “dende hai tempo existen numerosas reivindicacións e queixas sobre a saturación do sistema en Galicia”. “Isto”, indica a parlamentaria do PSdeG, “vén dunha ineficiente xestión en termos de recursos materiais e humanos froito das políticas de recortes executadas polo Partido Popular dende a Xunta”, que fan que “Galicia afronte a situación cun problema de persoal grave no sistema sanitario público”.
Así, “unha clara mostra deses recortes” detéctase nos orzamentos da Xunta para 2022, onde o goberno de Feijoo reduce en 2 millóns de euros as partidas destinadas á Atención Primaria en comparación cos orzamentos de 2021. Todo isto “nun contexto de listas de espera para os e as especialistas, problemas de saturación nos centros de saúde e cun sistema de saúde público que está na UCI”.