Asistentes á reunión esta mañá na delegación da Xunta en Vigo por parte da administración autonómica e da corporación de Cangas.

Sanidade enviará ao Concello os borradores do Plan Funcional, o de Espazos e dun convenio coas necesidades e melloras sanitarias na bisbarra. E a primeira vez que o goberno local de Cangas e a Xunta avanzan na construcción das novas instalacións sanitarias

Se o primeiro paso era poñer de acordo a todos os partidos da corporación sobre a necesidade de traballar na consecución dos terreos na Rúa para poder entregalos á Xunta e que esta constrúa a denominada nova “infraestrutura sanitaria”, á que de momento non puseronlle nome (CIS ou CAR). Hoxe deuse o segundo empuxón ao polémico tema. Nunha reunión entre a corporación e colectivos de Cangas, por unha banda, e consellería de Sanidade, polo outro, recoñeceuse por ambas as partes a necesidade dunha mellora da sanidade o municipio e, en definitiva, toda a bisbarra do Morrazo.

Segundo a alcaldesa, Vitoria Portas, o Concello queda pendente de que a Xunta lle traslade o os borradores do Plan Funcional, Plan de Espazos e o dun posible convenio onde se contemplen as necesidades e as melloras que precisa O Morrazo en materia sanitaria. Tres documentos que Sanidade comprometeuse a enviar ao consistorio para que este poida facer achegas, o que permitirá promover unha reunión de portavoces para ver se esas melloras sanitarias que se propoñen desde a administración autonómica realmente son o que precisa Cangas e O Morrazo ao recoñecer que se trata dunha infraestrutura que daría un servizo “supramunicipal”.

“Hai que recoñecer que a pesar de partir de opinións bastante diverxentes, é certo que existe intención polas dúas partes de aproximar posturas para mellorar a situación sanitaria no Morrazo”, confesou Portas, aínda que tamén declarou que “desde o Concello necesitamos que todo isto concrétese por escrito para sometelo a referendo de por parte da corporación, do Consello Municipal de Saúde e da cidadanía de Cangas”.

Pola súa banda, desde a Consellería de Sanidade eloxiouse a decisión da corporación canguesa de facerse cun terreo de maiores dimensións na Rúa para futuras ampliacións. En calquera caso, inciden, debe de ser dunha parcela cunha edificabilidade acorde ao establecido no Plan de necesidades para a poboación da área do Morrazo dos concellos de Cangas e Moaña realizado no ano 2018.

Ademais, e segundo explicou o seu portavoz, na actualidade, estase a revisar e a adaptar ese Plan Funcional e de espazos inicial, para posteriormente, trasladar esta información á rexedora canguesa.

Máis recursos e servizos en A Rúa

Segundo o plan, este novo centro contaría cun PAC, radioloxía dixital, laboratorio de parámetros básicos, área de telemedicina e imaxe médica avanzada, área integral de rehabilitación, área integral de odontoloxía e saúde bucodental, área integral de atención á muller, área integral de farmacia, área integral de especialidades médicas, área integral de saúde mental, área de formación e docencia, espazo para asociacións de pacientes, e non se descarta que haxa un hospital de nefroloxía para que se poida facer diálise.

Iso suporía, explican desde Sanidade, incorporar recursos asistenciais actualmente non existentes no centro de saúde de Cangas como a rehabilitación cardíaca e de solo pélvico, a base do 061, o laboratorio, as áreas de alta resolución de enfermería, de técnicas especiais cirúrxicas, de ecografía ou de preparación de consulta hospitalaria.

Consultorio de O Hío

En canto á petición veciñal da reapertura do consultorio de O Hío tras as momentos difíciles da pandemia, Sanidade indicou que aínda mantén a idea de construír o centro de saúde O Hío-Aldán cuxa parcela foi entregada no seu día polo Concello precisamente para este fin pero que despois de moitos anos aínda non chegou a facerse. “Aceptamos ese paso no que se escuda Sanidade”, afirmou a Alcaldesa, que tal e como acordou cos veciños de O Hío, foi a encargada de entregar ao conselleiro o documento elaborado por todas as asociacións da parroquia solicitando a reapertura do consultorio.

Á reunión asistiron representantes de tódolos partidos políticos representados na corporación de Cangas. Polo BNG estivo a súa portavoz, Mercedes Giráldez, a quen lle sorprendeu “gratamente que viñeran máis implicados por parte da Xunta”.

DEJA UNA RESPUESTA

Por favor ingrese su comentario!
Por favor ingrese su nombre aquí