O Concello sacou a licitación o proxecto da lámina de auga e a actuación na zona dos peches da dársena para a súa mellora e recuperación, que será realizado pola empresa Marcor Xove SL
A recuperación medio ambiental da antiga dársena portuaria, popularmente coñecida como Cemiterio de Chalanas, co obxectivo de poder utilizar a zona para actividades náutico-deportivas xa está adxudicada.
Este proxecto, que é unha das apostas pola recuperación de toda a zona que conecta a Praza de España co Paseo Alcalde Blanco, ten dúas partes diferenciadas, que se licitan de xeito separado: por unha banda, a recuperación medio ambiental da zona acuática, e, por outra, a mellora urbana do entorno.
A adxudicación, que recaeu na empresa Marcor Xove SL, é desta primeira fase, a da lámina de auga, e que suporá unha inversión a 270.733 euros, con cargo ao Plan de Sostibilidade Turística. O proxecto consistirá en abordar as problemáticas que presenta esta zona acuática. Tal e como se explica no proxecto, a dársena presenta un estado descuidado, coa presenza de neumáticos, fondeos, amarres e restos de obra, como cascotes, ladrillos e bloques de construción.
Por iso, é vital recuperar ambientalmente a dársena. Para iso, limparanse todos os fondos, retirando os residuos que aparecen neles. Ademais, actuarase no fondo fanganoso da dársena, para nivelalo e poder así estender unha capa de area de xeito regular. Tamén se retirará o actual tubo de pluviais, que se atopa no medio da dársena, para poñer un novo tubo que garanta unha boa recollida das augas pluviais.
Unha vez realizadas estas tarefas, colocarase unha capa xeotextil, que terá por unha banda, función de filtro, para evitar a mezcla do fango do fondo coa capa de area, e unha función estrutural. Ademais, limparanse todos os paramentos verticais do peirao e instalarase unha plataforma flotante de aluminio de 12×6 metros, co obxectivo de proporcionar un elemento de apoio ás embarcaciones deportivas.
300.000 euros máis do PSTD para completar a urbanización da zona e a conexión de Praza de España co Paseo Alcalde Blanco
Ademais, o Concello conseguiu unha ampliación do Plan de Sostibilidade Turística en Destino de 300.000 euros que se poderán destinar ao proxecto de urbanización do entorno da dársena, na súa conexión coa Praza de España, esa segunda actuación antes mencionada.
A urbanización consistirá na creación dun espazo peonil con zonas axardinadas, que poida ser unha zona de descanso e paseo para os veciños e veciñas de Marín.