Estado no que amenceu o Fisgón.

A alcaldesa, Leticia Santos, mostra a súa sorpresa polo comunicado da Subdelegación e lémbralle que o Concello fixo tódolos trámites oficiais para a solicitude de reforzos que sí tiveron o venres e non o resto da fin de semana

A Subdelegación do Goberno responde á polémica sobre a falta de reforzos da pasada fin de semana en Moaña cando se produciron numerosos actos violentos e agresións no paseo marítimo mentres máis de mil persoas concentrábanse facendo botellón. «Lembramos a necesidade dos Concellos de convocar unha Xunta Local de Seguridade cando se teñen programados festexos de certa magnitude, como poden ser as festas do Carme de Moaña -que este Concello decidiu levar a cabo a pesar de que outras moitas localidades da provincia cancelaran todos os eventos relacionados coa mesma-«.

Engaden que as Xuntas Locais de Seguridade «son os órganos colexiados previstos para facilitar a cooperación e a coordinación, no ámbito territorial do municipio, das Administracións Públicas en materia de seguridade. Nestas, os Concellos deben informar pormenorizadamente dos festexos previstos -actos, horarios, aforos-, así como facilitar os seus respectivos plans de seguridade, cumprindo asimismo coa normativa autonómica vixente en materia de control da crise sanitaria, para así poder asegurar de forma efectiva a cooperación e a coordinación operativa das Forzas e Corpos de Seguridade que interveñen no termo municipal».

Concretamente, en alusión ao Concello de Moaña, manifestan que «a solicitude de reforzo non ofrece nin garante a información que precisan as Forzas e Corpos de Seguridade do Estado para poder facer as estimacións e previsións necesarias en materia de seguridade cidadá na provincia. No caso de Moaña, so se recibiu tres días antes unha comunicación na que se indicaba exclusivamente a data de ditas festas patronais, que contarían con verbena, e se solicitaba axuda ao non ter o Concello suficientes efectivos para garantir a seguridade nos festexos».

Un escrito recibido o 16 de xulio

Comunicado recibido polo Concello de Moaña da Subdelegación.

Con todo, este requisito de que os concellos convoquen a Xunta Local de Seguridade para poder contar cun reforzo da Garda Civil non foi trasladado a Moaña. Segundo informa a alcaldesa, Leticia Santos, que mostra a súa sorpresa ante esta resposta da Subdelegación e o ataque ao Concello, o 16 de xullo, día festivo en localidade, recibiuse un comunicado xenérico da Subdelegación emitido a todos os consistorios e asinado pola subdelegada en accidental, María Isabel Alonso de Liñaxe Calzada, no que esta condición reflíctese como recomendación a futuro. «En todo caso, de cara ao futuro, o foro idóneo onde planificar estas grandes citas e eventos municipais han de ser as Xuntas locais de seguridade, onde as sinerxías derivadas do traballo conxunto dos distintos corpos policiais e de protección civil fan acadar, sen dúbida, os mellores resultados», recoge el comunicado.

Santos lembra que a propia noite do 16 de xullo ao 17 de xullo a Policía Local si contou coa colaboración da Garda Civil e, por tanto, deuse aceptada esa demanda de reforzos. Con todo, non continuou o sábado e o domingo. Unha solicitude que, por outra banda, xa se fixo chegar verbalmente aos mandos da Benemérita o 12 de xullo e que un día máis tarde materializouse oficialmente, por seguridade, polo xefe da Policía Local de Moaña á Subdelegación e ao que Morrazo Noticias tivo acceso desde o día de onte.

En canto á autorización por parte do Concello para celebrar as festas, a rexedora lembra non están organizadas polo consistorio e que se cumpren coa normativa vixente non poden prohibilas ou, pola contra, incorrerían nun delito.

Deja una respuesta

Tu dirección de correo electrónico no será publicada. Los campos obligatorios están marcados con *