A Alcaldesa mostrando o antes e o despois da rúa.

A Rúa Camiño Vello de Seixo xa loce a súa nova imaxe. A recente humanización levada a cabo neste viario tan importante para a parroquia supuxo unha transformación total do mesmo, non só do seu aspecto, senón tamén de todo o que ten que ver cos servizos de saneamento e abastecemento.

Na tarde de onte, ás 20.30 horas, realizouse unha visita oficial ao recentemente
humanizado viario, coa presenza da alcaldesa, María Ramallo; os deputados provinciais Santos Héctor Rodríguez, Gregorio Agís, Noemí Outeda e Raquel Giráldez; os concelleiros Pablo Novas e Raquel Soage, entre outros representantes do Goberno local, da Asociación de Comerciantes Marín Sur (Acemas) e doutras forzas da Corporación municipal.

“Esta era unha obra fundamental para Seixo, xa que se trataba dunha vía moi transitada, con moita veciñanza, e que se atopaba nun estado moi deteriorado, co pavimento afectado e con problemas pola antigüidade dos servizos públicos”, expuxo a alcaldesa durante a inauguración. Tamén un dos representantes da Deputación de Pontevedra realizou unhas declaracións en nome do ente institucional, do que deriva a subvención do Plan Concellos.

As autoridades durante o percorrido polo Camiño Vello de Seixo.

Co proxecto, levouse a cabo unha mellora integral de todas as “entrañas” da rúa, renovando todas as canalizacións de saneamento e abastecemento. E no que respecta á imaxe exterior, colocouse novo pavimento e novo mobiliario urbano, ademais de renovar toda a iluminación, cumprindo cos estándares de aforro enerxético.

Por outra banda, mellorouse o deseño do viario, deixando o carril da estrada nunha única dirección, de tal xeito que se puideron anchear as beirarrúas, que pasaron de medir 1,60 metros, aproximadamente, a estar en torno aos dous metros e medio.

A intervención realizouse con cargo ao Plan Concellos da Deputación de Pontevedra, cunha inversión total de 374.361,63 euros.

DEJA UNA RESPUESTA

Por favor ingrese su comentario!
Por favor ingrese su nombre aquí