A Deputación de Pontevedra investiu na zona do Morrazo preto de 400.000 euros a través do Plan Extraordinario de Infraestruturas Deportivas, con achegas aprobadas para catro concellos da comarca. En concreto, financiáronse un total de cinco proxectos, que mobilizaron preto de 600.000 euros, xa que o orzamento podía completarse con achegas municipais, doutras administracións ou incluso de plans provinciais como o +Provincia.
En Bueu, os 79.404,91 € do plan investíronse en dous proxectos: a mellora da eficiencia enerxética da iluminación do campo de fútbol da Graña (16.927,18 €) e a acometida eléctrica para a subministración do campo de fútbol da Graña (62.477,73 €). En Cangas do Morrazo, os 152.652,97 € dedicáronse á mellora da iluminación exterior do estadio municipal de atletismo. No caso de Moaña, destináronse 116.652,97 € para o proxecto básico e executivo de construción dun novo skatepark (complementado con máis de 41.000 € do plan de cooperación anual da Deputación cos municipios). Vilaboa, pola súa banda, recibiu 49.945,91 € para o acondicionamento e renovación das instalacións do pavillón do Toural.
Na súa valoración global do Plan Extraordinario de Infraestruturas Deportivas, o presidente Luis López sinalou que este é “a máxima expresión do que somos como goberno: a Deputación do municipalismo e do deporte”. O responsable provincial sinalou a súa grande acollida, xa que se financiaron un total de 75 proxectos dos 59 concellos da provincia de menos de 50.000 habitantes. “Este foi un dos primeiros plans que anunciamos como goberno, e reafirma o noso compromiso para mellorar e renovar as infraestruturas deportivas da provincia, que son auténticos templos para os hábitos de vida saudable, o lecer e o talento deportivo”, subliñou López.