O presidente da Xunta, Alberto Núñez Feijóo, informou este mediodía de que será o equipo de psicólogos de Emerxencias e Catástrofes da comunidade autónoma e tamén profesionais de Cruz Vermella os encargados de notificar desde hoxe mesmo a cada unha das familias dos mariñeiros as «confirmacións legais» que se vaian sucedendo respeto ao naufraxio do Villa de Pitanxo. Profesionais encargaranse de atender, resolver calquera dúbida ou de tratar aos seres queridos dos membros da tripulación. «Se rescatamos a algún máis dos desaparecidos tamén serán os psicólogos quen comunique ás familias o feito do falecemento», explicou Feijóo. Trátase dun protocolo semellante ao que levou a cabo no accidente do Alvia en xullo de 2013.
O mandatario autonómico explicou ante numerosos medios de comunicación presentes hoxe na sede da Autoridade Portuaria de Marín, onde se reuniu coas alcaldesas de Marín, Cangas e Moaña e o rexedor de Bueu, os municipios máis afectados pola traxedia de Terranova, para tratar de «coordinar» os pasos a seguir desde este momento. «Estamos ante unha dobre dor, como é o de non saber cal é a situación deste familiar, o de non saber cando imos ter confirmación do ocorrido e, tamén, hai que anticipalo, o de que hai persoas que, probablemente, tarden moito tempo en aparecer», recoñecía Feijóo, polo que pediu respecto ás familias para que «a dor das familias sexa tratado por profesionais».
Unha vez que o goberno central notifique definitivamente a identidade dos cadáveres e esta información tamén sexa coñecida polo armador e polas familias, a Xunta fará públicos os nomes e apelidos das vítimas aos medios de comunicación. Mentres tanto, indicou Feijóo, pediu «cautela» polo «dereito á intimidade e á asistencia psicolóxica das familias».
O presidente autonómico puxo de manifesto que desde o 1978 non se producía un sinistro no mar como o do Villa de Pitanxo.