O PP reclama a Sánchez que corrixa a lei do só si é si
María Ramallo: “Non hai que ser nin orgulloso nin soberbio. Cando un comete un erro, o máis fácil é rectificar”.
O Partido Popular e os veciños de Marín mostraron hoxe a través dunha concentración neste concello o seu apoio ás vítimas de agresores sexuais, reclamando a Sánchez unha rectificación urxente da lei do só si é si e o cesamento inmediato da ministra de Igualdade. Co lema Sánchez, polas vítimas, rectificación si ou si, os presentes quixeron poñer de manifesto a súa repulsa cara ás consecuencias que está a ter a aplicación desta lei.
“Utilizamos este momento para lanzar un grito e esixir que se corrixa esta situación con urxencia”, sinalou a alcaldesa María Ramallo, recordando que Marín é un dos concellos que hai só uns días tivo que comprobar como unha das revisións de condenas reducía a pena dun violador. “Os datos están aí, e non se pode permitir que continúe habendo redución de condenas en delitos tan graves. Nós que tanto tempo insistimos e nos solidarizamos coas vítimas, temos que pedir rectificacións. E está na man do goberno cambiar esta situación. Non hai que ser nin orgulloso nin soberbio. Cando un comete un erro, o máis fácil é rectificar. Sobre todo si ese erro está producindo dano e dor ás vítimas”.
Xunto coa alcaldesa de Marín, María Ramallo, participaron na concentración o presidente provincial do partido, Luis López, a secretaria xeral, Luisa Piñeiro, así como a vicesecretaria de Igualdade do PPdeG, Raquel Touriño, entre outros veciños. Recordaron que en Galicia 30 agresores sexuais galegos xa viron rebaixadas as súas condenas, 12 deles na provincia de Pontevedra, dos que un condenado xa foi excarcelado. “Ninguén se merece, e moito menos as vítimas, ver como cada día a revisión de condenas vai en aumento. Cada rebaixa de pena é unha inxustiza”, e por iso, os populares din que “seguiremos alzando a voz. Neste tema hai que ser serio e concluínte. Hai que corrixir canto antes unha lei que está desprotexendo ás
mulleres e ás vítimas”.