O Concello solicitou por escrito esta limpeza ao ente autonómico, propietario do vial, para garantir a seguridade do tráfico e a protección contra os incendios
A Xunta de Galicia, a través da empresa Seaga, iniciou esta semana os traballos de desbroce e tala integral en todo o trazado da Variante V-G 4.4, unha limpeza que foi solicitada polo Concello de Marín por escrito para conseguir dous obxectivos. Por unha banda, garantir a seguridade do tráfico, e por outra, garantir a protección contra os incendios.
Tal e como explica o concelleiro de Medio Rural, Pablo Novas, “durante este mes de agosto están traballando no desbroce das zonas nas que non se afecta ao tráfico rodado, entendendo que é un momento de alta densidade de desprazamentos por ser época estival. Despois, a partir de setembro, faranse as talas, que poden comportar cortes puntuais da circulación”.
A inversión por parte do ente autonómico supera os 200.000 euros xa que se trata dun ámbito moi estenso, de 13 quilómetros con taludes e explanadas moi amplas.
Avance dos desbroces a nivel local
Por outro lado, Novas recordou que segue en executándose o Plan Municipal de Desbroces da man da Fundación Juan XXIII. Nestes momentos, os operarios forestais están rematando os últimos núcleos da zona 4, que comprenden zonas altas da parroquia de Santomé e do Campo, así como o núcleo de Pastoriza.
Por outra banda, comezouse tamén coa limpeza dos montes públicos máism cercanos ás vivendas, un traballo que continuará ao longo de todo o mes de setembro.
O Concello quere destacar “o gran esforzo que se fai neste ámbito para poder chegar a todas as zonas do termo municipal nun traballo tan complexo como é o desbroce, con tantos quilómetros de camiños e estradas”.