A Consellería de Sanidade poñerá en servizo o vindeiro día 15 de xuño o novo centro de saúde de Moaña, garantindo a atención sanitaria urxente á poboación as 24 horas dos 7 días da semana.
O Servizo Galego de Saúde está a ultimar os preparativos para a posta en servizo desta nova infraestrutura sanitaria de vangarda executada en Moaña grazas a un investimento da Xunta de preto de 9,6 millóns de euros tendo en conta as obras e o equipamento.
O conselleiro de Sanidade, Antonio Gómez Caamaño, acompañado da delegada territorial da Xunta en Vigo, Ana Ortiz, e do xerente da área sanitaria de Vigo, Javier Puente, visitará mañá o novo centro sanitario.
Trátase dun equipamento sanitario que amplía notablemente a superficie do actual centro de saúde de Moaña, ao tempo que achega maior comodidade, accesibilidade e capacidade para albergar novos servizos sanitarios.
O proxecto foi deseñado polo estudo de arquitectura Iglesias Veiga Arquitectos, autor tamén do deseño do Centro Integral de Saúde de Lalín, así como do novo centro de saúde que a Xunta está a construír en Vilagarcía de Arousa.