Novas cos veciños de Bexe.

As 33 vivendas que se beneficiarán da instalación do novo servizo de abastecemento poderán conectarse á rede municipal, resolvendo os problemas que se producían coa traída veciñal

O núcleo de Bexe xa está en obras para poder dotar ao lugar da nova rede de
abastecemento que lle permitirá aos veciños e veciñas conectarse á traída
municipal. Con eles mantivo unha reunión a pé de obra o concelleiro de Medio
Rural, Pablo Novas, esta semana.

“Reunímonos con eles para visitar o comezo da obra por parte de COVSA,
empresa que resultou adxudicataria, e que xa está traballando no terreo. E, sobre
todo, para explicarlles como se procederá a partir de agora para que poidan
conectarse e xestionar a alta no servizo”, explicou o concelleiro.

Novas afirma que esta obra supón “unha importante mellora na calidade de vida
de Bexe” e, de feito, “os veciños mostráronse moi ilusionados, xa que damos
resposta a unha das demandas que tiñan desde hai anos”. E é que ata agora as
súa traída veciñal non era abondo na época do verán, na que sempre se
producían problemas con subministro, algo que xa non acontecerá coa conexión
á traída pública.

Os traballos teñen un prazo inicial de execución de 3 meses, polo que de cara á
época estival xa estará rematada a actuación e posta en funcionamento. “Con
esto seguimos demostrando o noso compromiso total co rural, para que teña uns
servizos públicos de calidade, igual ca no casco urbano”, afirmou o edil.

En total, son 33 vivendas as que se verán beneficiadas deste proxecto, no que se
investirán máis de 126.600 euros con cargo ao Remanente de Tesourería.

Deja una respuesta

Tu dirección de correo electrónico no será publicada. Los campos obligatorios están marcados con *