A compañía Redrum Teatro porá en escena mañá 11 de novembro en Bueu a función “#2Pilgrims”, no marco do ciclo “Tornar ás táboas”, co que a Deputación de Pontevedra está a espallar o teatro por toda a provincia neste último trimestre do ano. A representación dará comezo ás 20:00 horas no Centro Social do Mar e a entrada será libre ata completar o aforo.
Dirixida ao público mozo e adulto, a peza está protagonizada por Sheyla Fariña e Guillermo Carbajo, que se interpretan a si mesmos nun hipotético ocaso das súas carreiras, despois de ter sido recoñecidos polos seus traballos na televisión. Ela protagonizara a serie “Acacias 38”, e el foi o neno de “Pratos Combinados”. No contexto dun mundo caótico, grazas á globalización, ás redes sociais, a Netflix e a un ditador psicópata, teñen con “#2Pilgrims” unha última oportunidade que retornar ao firmamento de estrelas da TVG. O Camiño de Santiago, a igualdade e as novas masculinidades serán os temas principais deste novo proxecto, unha aventura cativadora que poderá catapultar as súas carreiras á actualidade internacional.
Co ciclo teatral “Tornar ás Táboas” a Deputación de Pontevedra vai achegar entre outubro e decembro un total de 49 funcións gratuítas e dirixidas a todos os públicos a outros tantos concellos da provincia de menos de 20.000 habitantes, coa participación de trinta compañías galegas que ofrecerán unha ampla variedade de espectáculos.