O goberno local convida a visitar as casetas situadas en Paredes, unha iniciativa que visibiliza o traballo feito a man por emprendedores locais
Cinco casetas e dous postos anexos completan o Mercadiño de Nadal que desde este fin de semana e ata o 7 de xaneiro estará instalado na carretera vella de Paredes para converterse nun escaparate do potencial creativo da artesanía vilaboense.
O Mercadiño, que este ano alcanza a súa terceira edición impulsado pola Concellalía de Promoción Económica, busca aportar alternativas sostibles no medio rural e concienciar sobre un necesario cambio de hábitos nos consumos.
Xoiería artesanal, esmaltes, manualidades, alimentación ecolóxica, prendas de segunda man, xabóns artesanais, adornos e complementos con impresión instantánea, repostería caseira e bebidas quentes son algunhas das opcións coas que Vilaboa se posiciona na ampla oferta de mercadiños de nadal. Están nas casetas tamén a rapazada do CPI O Toural, buscando financiar a excursión de fin de curso do alumnado de cuarto da ESO con artigos elaborados por eles e o colexio Riomaior. Detrás de cada produto hai unha historia de creación e de inspiración, a que lle imprime cada artesán participante: Laura Filgueira, Zeltia López, Pilar Blanco, Montserrat Rosendo, Carmen Castro e Carlos Acuña, que este ano aposta pola alimentación ecolóxica coa súa tenda Alcrique Eco.
![](https://morrazonoticias.com/wp-content/uploads/2023/12/ALUMNOS-DE-RIOMAIOR-1024x768.jpeg)
![](https://morrazonoticias.com/wp-content/uploads/2023/12/STAND-LAURA-FILGUEIRA.-ERRE3-1024x768.jpeg)
Tamén Pilar Blanco, de Obradoiro Hedra, recunca no Mercadiño para ofrecer exclusividade coas súas pezas de xoiería, esmaltadas artesanalmente con técnicas tradicionais para quenes busquen diferenciarse. A camelia é de novo este ano a raíña do stand, a flor do inverno inspira a Pilar Blanco que fixo da súa paixón pola emblemática árbore das Rías Baixas un referente nas súas pezas de xoiería, con broches, pendentes, colgantes e anels, etc.
Laura Filgueira tamén repite no Mercadiño. Faino coa súa aposta emprendedora, Erre3, unha tenda de artesanía coa que lle da unha segunda vida a madeira usada, convertendoa nun adorno de Nadal, nunha taboa de cociña ou nun chaveiro. Ainda que menos innovador o stand que comparten Montserrat Rosendo e Carmen Castro, “Cachito, de seguro ten capacidade para sorprender. Artiluxios usados de todo tipo, pezas de arte en madeira, antigüidades, prendas vintage e “vellerías”, como lles gusta chamalas, buscan unha segunda vida en fogares que aprecen a beleza da calidade. E para quen simplemente queira conversar sobre o uso que antaño tiñan algunha das pezas reunidas nesta caseta terán nestas dúas veciñas de Vilaboa unhas excelentes conversadoras.
O alumnado do colexio do Toural de 4º da ESO está tamén no Mercadiño de Vilaboa. Ofertan gofres, biscoito, empanadillas, chouripán e algunha que outra sorpresa coa que queren recadar cartos para a súa viaxe a París. Frente a eles está a o alumnado do colexio de Riomaior. Comercializan artigos variados de agasallo elaborados por eles mesmos para financiar a excursión de fin de curso, no seu caso a Dublín.
![](https://morrazonoticias.com/wp-content/uploads/2023/12/CESAR-NO-MERCADINO-1024x768.jpeg)
![](https://morrazonoticias.com/wp-content/uploads/2023/12/STAND-BEBIDAS-QUENTES-DA-ASOCIACION-CARRETERA-VELLA-1-1024x768.jpeg)
O Concello cedeu a sexta caseta á asociación Carretera Vella, na que se ofrece chocolate quente recén feito por integrantes deste colectivo veciñal para sufragar os gastos derivados polo ambientación navideña nesta contorna de Paredes.
O Mercadiño estará aberto todas as tardes ata o 7 de xaneiro e en horario de mañán e tarde as fins de semana e os festivos.