A extensión do saneamento e melloras nas escolas infantís súmanse á pista de Pump Track, a recuperación do Muíño do Toxal e ao Mirador do Cabalo nas obras a executar
O orzamento municipal para o ano 2025 reserva unha partida de 414.500 euros para acometer diferentes obras e melloras en todas as parroquias de Vilaboa, á que hai que sumar outra de 240.000 euros para a limpieza e funcionamento da rede de saneamento o que fai un total de 654.500 euros.
As contas para 2025 recollen tamén un investimento importante na mellora de infraestruturas utilizadas a diario pola poboación infantil, destacando sobre todo 40.000 euros para acometer obras de reparación nas escolas infantís do municipio e outros 40.000 para a dotación dunha pista de pump track na Canteira de Paredes, recentemente cedida ao Concello pola Comunidade de Montes a través dun convenio e que ofrecerá un espazo de ocio e deporte para a mocidade de Vilaboa.
Unha partida de 30.000 euros para saneamento; 48.000 euros para acondicionar o miradoiro do Monte do Cabalo; 45.000 para a recuperación do muiño do Toxal no río do Gafos; 3.000 para melloras en edificios construídos, 22.000 para adquisición de mobiliario urbano e 45.000 euros para a recuperación de elementos patrimoniais completan unha parte das actuacións previstas para este ano 2025.
O investimento en terreos e na mellora de infraestruturas suman unha partida de 110.000 euros nun orzamento que recolle partidas simbólicas para obras importantes como son a reforma da Casa de Cultura de Riomaior e a remodelación do parque público aledaño que deben superar os informes sectoriais previos debido ás afectacións que lles afectan. “En tanto os expedientes estén listos comezaremos os traballos”, destaca César Poza.
Outra partida importante recollida no documento económico é a que corresponde ao servizo de limpeza da rede de saneamento e que ascende a 240.000 euros, xa que un correcto mantemento das tuberías contribúe a unha maior eficiencia deste servizo e, sobre todo, a evitar desbordamentos e filtracións.
A dotación dunha extensa rede de abastecemento de auga a todo o municipio é un dos retos que se prantexa o goberno local e que depende, en grande medida, da posta en marcha do ente supramunicipal liderado por ACUAES e que permitirá achegar ata Vilaboa a captación do río Lérez. Para participar neste proxecto o orzamento de Vilaboa recolle unha partida de 55.000 euros.
A modificación puntual do PXOM conta tamén cunha partida específica de 15.000 euros que facilitarán a súa tramitación para correxir erros puntuais detectados en diferentes aspectos do planeamento.