O Concello de Marín segue no seu proceso de renovar e mellorar todo o alumeado público municipal, para instalar tecnoloxía LED e conseguir así o máximo aforro enerxético posible.
Desta vez, acadou unha subvención de case 30.000 euros do Fondo de Compensación Ambiental, dependente da Consellería de Presidencia, Xustiza e Deportes, para poder acometer estes traballos, que foron adxudicados á empresa SETGA por valor de 37.552 euros, sufragando o restante con fondos propios.
En total, actuouse sobre 55 puntos de luz, 22 dos cales son de nova instalación. Estes novos, cubrirán todo o itinerario que dá acceso tanto á Casa de Cultura de Ardán como ao recinto da festa, permitindo que non haxa problemas de visbilidade en practicamente ningún punto da zona.
Todas as bombiñas que se están instalando son LED e está previsto que se poida dar por rematada a instalación ao longo do que resta de semana.