Os populares reclaman ao goberno local sancións e supervisión á actuación da empresa “como é a súa responsabilidade”
Cangas viviu novas verteduras de augas fecais nas últimas semanas. Así o denuncian desde o Partido Popular de Cangas á vez que responsabilizan ao BNG e os seus socios “pola súa inacción e compadreo coa empresa concesionaria”. Así, o pasado 21 de marzo produciuse unha vertedura en Vilariño procedente do motor de bombeo e outra o día 30 en Santa Marta- Liméns debido ao priódico desborde dos colectores de augas fecais. “O máis grave é que non teñen ningunha consecuencia. Contaminar as nosas rías sae gratis e ninguén asume a responsabilidade do continuado deterioro que están a producir na nosa costa” denuncian.
O grupo municipal maioritario da Corporación recorda as numerosas iniciativas presentadas ao Pleno e “que quedaron no caixón”. Tamén aluden ás “promesas baleiras” dos responsables municipais “que levan 10 anos prometendo a municipalización do servizo así como resolver un problema que, lonxe a ir a mellor, vese agravado co paso do tempo”. A formación recorda de que se trata dunha competencia municipal e que o equipo de goberno non solicitou ata este ano ningunha das axudas autonómicas para auditar a rede como paso previo a obtar a fondos autonómicos para actuacións concretas.
Os populares sinalan esa “pasividade, falta de traballo e incompetencia” como parte do problema que impide resolver “o maior problema medioambiental do municipio”. “Resulta irónico que acudan a manifestacións noutros concellos defendendo o coidado ás nosas rías cando está pasando esto en Cangas. Cinismo puro” sinalan. “Da igual que chova ou non, a porquería segue rematando no mesmo sitio” engaden en alusión á recurrente explicación do Goberno local de que a causa son as chuvias e a non separación de pluviais e fecais, “que sen dúbida agravan o problema” aclaran.
O PP reclama sancións e supervisión á actuación da empresa “como é a súa responsabilidade” e investimentos reais na rede “non só a propaganda dos últimos anos” que realmente corrixan esta situación”. Recordan o impacto destas verteduras no sector pesqueiro e marisqueiro do concello. “A ría de Aldán recuperou recentemente a categoría A que podería perder de novo de persistir estas verteduras” alertan, a última o día 31 na praia de Francón. “Os grupos do goberno levan unha década na xestión municipal. Basta xa de xa de excusas de mal pagador, de botar balóns fóra ou de mirar cara outro lado comprando o discurso da UTE que non quere investir nin un euro no correcto mantemento da rede, como lle corresponde” declaran. “Cada día que pasa quedan máis en evidencia que é un tema nin que preocupe nin que ocupe a este equipo de goberno” continúan. “Nós insistiremos con novas iniciativas e denunciando esta situación. Négamonos a aceptar que Cangas esté condeada a padecer este problema eternamente” rematan.