O Concello de Moaña arrinca este venres coa programación preparada pola concellería de Benestar Social, a través do Centro de Información á Muller (CIM), para conmemorar o Día Internacional contra a Violencia de Xénero que se celebra cada ano o 25 de novembro. O primeiro evento terá lugar no salón de plenos do consistorio ás 19:30 horas e será a presentación do libro «Galegas na ciencia» a cargo da autora Isabel Blanco. Unha charla-coloquio á que tamén asistirá a alcaldesa, Leticia Santos, e a concelleira da área, María Ortega.
O acto central da programación terá lugar o propio 25 N ás 12:00 horas tamén no Concello. Como xa é tradición, realizarase un acto institucional con lectura do manifesto e unha homenaxe ás mulleres vítimas de violencia no 2021 coa exposición de panos tecidos pola Asociación de Mulleres de Moaña e Poza da Moura.
Máis tarde, ás 18:00 horas, haberá unha charla-coloquio a cargo da traballadora social Adoración Varas Nogueirol, da Oficina de Atención ás Vítimas do Decanato de Vigo. Neste caso o acto desenvolverase na sede da Asociación de Mulleres de Moaña. Do mesmo xeito que a actuación do Coro Chorima ás 19:15 horas. A continuación, terá lugar unha procesión cívica ata a Oliveira da Alameda con lectura de Poemas.
Xa o 26 de novembro, ás 18:00 horas, proxección de curtos sobre o 25 N cunha charla café no Centro Cultural Rosalía de Castro de Domaio organizada pola Asociación de Mulleres.