A alcaldesa, o concelleiro de Cultura e a tenente de alcaldesa mostrando o cartel do entroido.

Moaña celebrará esta fin de semana o Entroido de verán como antesala ao que se espera sexan os tradicionais entroidos de inverno que tiveron que suspenderse pola pandemia e que o próximo mes de febreiro o Concello confía en poder volver celebrar. A programación está prevista para o venres 17 e para toda a xornada do sábado 18 e nela participarán todas as comparsas de Moaña que, na medida do posible, tratarán de recuperar o espírito carnavalero.

O venres ás 19:30 horas Assircópatas: Rogelio abrirá a programación co espectáculo de novo circo dirixido a un público familiar na arboleda da Xunqueira. En caso de mal tempo, trasladarase ao Centro Sociocultural Daniel Castelao de Quintela.

Xa o sábado, desde as 12:00 horas da mañá, pasacalles con Troula Animación “Polis Tolos” pola contorna da praza de abastos para lembrar que pola tarde, o entroido trae os seus pratos fortes. Ás 13:00 horas, na arboleda da Xunqueira, sesión vermú con Leda Atómica e a súa “concerto que non é un concerto”. O Circo Chosco con “Oh! Pera” volverá amenizar a tarde ás familias e xa ás 19:30 horas Ningún DJ poñerá música ambiente de entroido.

Ás 21:00 horas chegará a proxección do vídeo do pregón que, segundo informa o concelleiro de Cultura de Moaña, Carlos Juncal, será a segunda parte da produción que xa se realizou o pasado entroido e que se emitiu polas redes sociais do Concello para conmemorar a festividade ante a imposibilidade de poder celebralo da forma tradicional. “Coñeceremos o final do curto”, adiantou Juncal. A partir de aí dará comezo a actuación das comparsas de Moaña.

Desde o goberno local insisten en que en todas as actividades cumpriranse escrupulosamente as medidas anticovid, polo que os asistentes deberán permanecer sentados para gardar a distancia de seguridade establecida. Aínda así, non queren que este sistema de prevención desluza o espírito do entroido tan arraigado en Moaña e animan a todos os veciños a participar e disfrazarse esta fin de semana.

DEJA UNA RESPUESTA

Por favor ingrese su comentario!
Por favor ingrese su nombre aquí