O Concello de Marín procedeu no día de hoxe á retirada de dous exemplares de plátano de sombra (Platanus x hispanica) situados na Alameda, tras confirmar a súa perigosidade e o seu deficiente estado sanitario.
Esta medida preventiva tomouse despois de solicitar un un informe técnico á Estación Fitopatolóxica Areeiro (Deputación de Pontevedra), cuias conclusións desaconsellaron o mantemento das árbores polo risco que supoñían para a seguridade cidadá, instando á súa retirada.
Segundo os estudos realizados polos técnicos, os exemplares presentaban problemas estruturais e sanitarios graves que comprometían a súa estabilidade. A madeira aparecía degradada, detectouse presenza de fungos xilófagos (que producen podremia) e había risco de caída de polas secas de gran tamaño.
O goberno local subliña que a prioridade absoluta é garantir a seguridade dos veciños e usuarios deste espazo público tan utilizado, por iso en aras a evitar calquera incidente, esta mañá procedeuse á retirada de ambos exemplares.