A guía inclúe 52 roteiros de diferentes niveis de dificultade e todas as ferramentas dixitais descargables para unha mellor planificación do percorrido
Percorrer 2.300 quilómetros con cero emisións é posible grazas á ferramenta interactiva A paisaxe galega desde a bicicleta. Unha guía elaborada pola Vicepresidencia Segunda e Consellería de Medio Ambiente, Territorio e Vivenda, a través do Instituto de Estudos do Territorio (IET), en colaboración coa Federación Galega de Ciclismo, que conta con 52 roteiros nos que logra combinar divulgación e conservación da paisaxe co ciclismo. Por tanto, para os amantes das dúas rodas, esta oportunidade supón unha proposta turística sostible que, ademais, pode adaptarse para todos os niveis de dificultade. Mediante un visor, o interesado pode planificar os roteiros para que os percorridos, ademais de ser seguros, tamén sexan aptos para as familias.
Como planificar os roteiros?
Planificar os roteiros é moi fácil e está adaptado ás novas tecnoloxías. Cada un dos 52 percorridos conta con fichas descargables que inclúen mapas, perfís do terreo, fotografías e os lugares de maior interese paisaxístico que poden gardarse en dispositivos móbiles, reloxos intelixentes ou GPS. Tamén existe a posibilidade de utilizar a plataforma gratuíta Wikiloc, que xa conta con 10 millóns de usuarios.
Gran interese polo lecer sostible
A aposta das familias por viaxar dunha forma sostible é cada vez máis palpable. Desde a posta en marcha desta iniciativa xa se recibiron máis de 14.400 visitas e 950 descargas en diferentes dispositivos. Unha tendencia que vai en crecemento e que, ademais, contribúe a reducir o número de vehículos na estrada e, por tanto, a reducir o número de emisións ao medio ambiente.