A formación estradense reunirá sobre o escenario arredor de 45 intérpretes entre instrumentistas e voces, nun concerto que comezará ás 19.00 horas
O Auditorio de Marín acollerá este domingo, 15 de novembro, ás 19.00 horas, o concerto da Big Band Carlos Barruso da Estrada, unha formación que achegará ao público marinense o resultado do seu intenso traballo arredor da interpretación, a improvisación e as diferentes linguaxes da música moderna.
O proxecto reúne actualmente arredor de 45 persoas sobre o escenario, entre instrumentistas e cantantes, e foi consolidando ao longo destes anos diferentes formatos estables, como a big band, o coro e os combos. A actuación permitirá descubrir a dimensión artística e pedagóxica dun obradoiro convertido nun espazo de encontro para músicos cunha formación previa interesados en profundar no jazz, o blues, o rock, o funk, o soul e outras expresións contemporáneas.
Unha gran formación dedicada á música moderna
A celebración de concertos forma parte esencial da actividade do Obradoiro de Música Moderna Carlos Barruso. Neles, o alumnado leva ao escenario os coñecementos harmónicos, rítmicos, melódicos e técnicos traballados durante o curso, cunha atención especial á interpretación colectiva e á improvisación. O crecemento continuado do número de participantes permitiu dar forma a unha big band numerosa, complementada polas voces do proxecto e por diferentes agrupacións de menor formato. Esta estrutura converte cada actuación nunha mostra da diversidade sonora da música moderna e do valor da aprendizaxe
compartida.
Ao longo da súa traxectoria, o obradoiro tamén colaborou con músicos de prestixio como Abe Rábade, Joan Chamorro, Ton Risco ou David Berger, que participaron nas súas actividades e contribuíron a enriquecer a formación dos seus integrantes.
O legado musical e pedagóxico de Carlos Barruso
O obradoiro constituíuse como proxecto municipal na Estrada en 2019 co obxectivo de dar continuidade ao traballo desenvolvido durante anos polo saxofonista, multiinstrumentista e docente Carlos Barruso, unha figura fundamental para comprender a evolución da música moderna en Galicia.
O músico desenvolveu un intenso labor artístico e pedagóxico, formando diferentes xeracións de intérpretes e impulsando o coñecemento do jazz, o rock, o funk e outros estilos. En 2019 recibiu o Premio Honorífico Músicas ao Vivo, concedido no marco dos Premios Martín Códax da Música, como recoñecemento á súa traxectoria e á súa contribución á formación musical.
A creación dunha big band vinculada ao obradoiro era un dos grandes obxectivos do proxecto e representa hoxe unha das expresións máis visibles do legado que Carlos Barruso deixou entre o alumnado e os músicos da Estrada.