Os populares consideran que este proxecto, cos terreos de xogo levantados e sen avances desde hai case dous meses, son unha mostra máis da “absoluta incompetencia do Bloque en todo o que non sexa protestar e manifestarse, xa que niso si que son uns fenómenos”
O grupo municipal do PP de Moaña vén de denunciar de novo a total paralización das obras de mellora dos campos de fútbol keniata dos colexios de Seara e Reibón, xa que seguen practicamente no mesmo punto que hai dous meses cando se iniciaron e non teñen visos de rematarse a curto prazo co conseguinte prexuízo para os alumnos e os demais usuarios.
Por elo, os populares criticaron os “incumprimentos e mentiras” do goberno do BNG tanto nos prazos de execución, xa que están a piques de cumprirse os dous meses que figuran no contrato, como no seu anuncio de que estas instalacións estarían rematadas antes do inicio do curso escolar, que comezou o pasado 8 de setembro, para o seu uso polos cativos.
Neste senso, o PP moañés lembrou que a finais de agosto xa denunciou que, tras uns primeiros días de traballos, os terreos de xogo quedaran levantados e non se estaban a experimentar avances malia que a actividade lectiva estaba a piques de empezar e agora, cinco semanas despois, critican que a situación sexa practicamente a mesma e non se rexistraran case avances en todo este tempo.
“Atopámonos ante un novo episodio máis do ‘culebrón’ da absoluta incompetencia do Bloque en todo o que non sexa protestar e manifestarse, xa que niso si que son uns auténticos fenómenos, pero cando hai que xestionar, atender á xente e preocuparse, neste caso, polos cativos, aí xa se lle rebentan as costuras por todos os sitios”, lamentou o voceiro municipal, Alfonso Piñeiro.
Ademais, o PP incidíu en que a actual situación destes dous campos de fútbol-7 demostra que a alcaldesa, Leticia Santos e o concelleiro de deportes, “mentiron descaradamente” a finais de agosto cando respostou ás primeiras queixas formuladas polo PP asegurando que as obras estaban en marcha. “Ou a rexedora mentíu ou a marcha das obras era tipo ‘ienka’ cun pasiño para adiante e outro para atrás porque só hai que mirar os campos para ver que están practicamente igual e que non van a poder ser usados en breve prazo”, manifestou.
Os populares engadiron que estes problemas veñen a ser novos atrancos e deficiencias nun proxecto que xa arrancou moi mal pola “incompetencia” do BNG, posto que inicialmente presentaron un proxecto que foi rexeitado polos usuarios e as Anpas posto que apenas supoñía unha reposición de area, tiveron que reforuúlalo xerando máis retrasos e logo aceptaron unha oferta anormalmente baixa, que bordeaba a baixa temeraría e que curiosamente procedía da empresa que acometeu, con moitas eivas, o proxecto do Casal.
Por todo elo, desde o PP moañés queren esixirlle ao goberno nacionalista que se tome en serio esta actuación dunha vez por todas e que a xestione con axilidade “porque xa vai un mes de curso escolar e, polo flagrante incumprimento do BNG, os nenos non poden usar estas instalacións e teñen que estar aquilatados nos patios en vez de empregalos para o seu lecer e esparcemento”. Ou ben pode axudar a organizar unha manisfestación para esixir que se arranxe canto antes unha situación perigosa para as crianzas dos colexios.