Poza agradece ao PP que entenda que a revisión dos cemiterio non ten nada que ver co aprobado e ínstao a traballar en conxunto nunha ordenanza específica
O goberno local continua coa actualización do Inventario Municipal despois da sesión plenaria celebrada este mércores onde se deu resposta a algunhas das alegacións presentadas a este documento durante o seu período de exposición pública.
O debate plenario permitiu ademáis que César Poza, alcalde de Vilaboa, explicase ao portavoz do Partido Popular a diferenza entre a actualización prevista e o traballo que queda pendente de revisión dos bens situados nos cemiterios públicos. Segundo explicou o goberno local, o proceso actual céntrase nunha actualización do inventario municipal, non nun traballo de delimitación pormenorizada das propiedades privadas e públicas dentro dos cemiterios. “Coincidimos en que os cemiterios están mal reflectidos no inventario municipal desde que este se aprobou o ano 1993, pero o que estamos facendo agora mesmo non abrangue ese traballo específico”, sinalaron fontes municipais.
O Concello quere deixar claro que en todo momento se respectan todas as propiedades privadas existentes. “Nas fichas do inventario que se van incorporar definitivamente se reflicten so os estritamente público, é dicir os viais, muros, cruceiros e capelas”, explicou o alcalde. De feito, o valor da construción nas fichas aparecera como cero, precisamente para non incluír elementos cuxa titularidade non está claramente determinada”.
O goberno municipal recoñece que é necesario realizar un traballo específico e sosegado para delimitar con exactitude que panteóns e nichos son privados, cales teñen concesión pública e cales son de titularidade municipal. “Este traballo farase máis pronto que tarde, coas garantías necesarias e dándolle solucións e certezas á veciñanza”, aseguraron. “Somos conscientes de que existen carencias no inventario actual” como a falta de rexistro dos panteóns municipais do cemiterio parroquial de Figueirido, cuestións que se abordarán nun proceso específico, que está pendente e que irá ligado á redacción dunha ordenanza específica “non hai erros a hora de reflectir a situación dos panteóns privados nos cemiterios municipais, iso non era o que tocaba agora”.
César Poza convidou ao grupo municipal do Partido Popular a facer unha oposición construtiva e facer as aportacións que considere necesarias para levar a bo fin esta tarefa. Desde o Concello insístese en manter unha postura construtiva e evitar polémicas innecesarias e nese sentido agradeceu ao portavoz popular que abandone a súa actitude “catastrofista e fatalista” que en nada beneficia á veciñanza.
Neste sentido “avogamos por ser o máis abertos e permeables posibles, sobre todo para que non queden dúbidas sobre este proceso e dar pe a malas interpretacións, así as fichas do inventario na súa redacción definitiva recolleran as aportacións necesarias”.