O Catastro está a poñerse en contacto coas propiedades das parcelas sobre as que se levantará o novo centro de saúde de Sisalde, en Moaña, para «comprobar se existen erros» e confirmar que a «modificación exposta non alterará a realidade física das parcelas sobre o terreo senón adecuar a cartografía á realidade e ao reparcelamento establecido no proxecto de equidistribución».
En definitiva, o que trata a Xerencia Territorial deste organismo con esta carta aos donos é comunicar as parcelas de titularidade privada incluídas no proxecto de equidistribución presentado polo Concello no Rexistro da Propiedade a principios de 2021. O Catastro dá de prazo 10 días hábiles para presentar alegacións. Se non as houbese, e así debería de ser posto que todos son coñecedores do mesmo, faría a validación gráfica que posteriormente enviaría ao Rexistro e, por tanto, este outorgaría a propiedade ao Concello. Unha vez o consistorio sexa dono da totalidade da parcela, procederá a cedela á Xunta mediante acordo plenario para que comece coas obras de execución das instalacións sanitarias.
O goberno local de Moaña pretendía ter concluído este trámite legal a finais deste 2021 e comezar 2022 cumprindo na súa totalidade o seu parte do convenio coa Consellería de Sanidade en febreiro de 2020, con todo, a complexidade do procedemento por parte do Rexistro, está a dilatar os tempos.