Darán comezo o 1 de setembro na Aula CeMIT da Casa da Mocidade en horario de mañá
Comezan en setembro os cursos gratuitos para persoas adultas no Concello de Moaña. A Aula CeMIT da Casa da Mocidade inicia o vindeiro 1 de setembro a súa programación de cursos destinados a persoas adultas, con especial atención ás persoas maiores que desexen comezar a usar o ordenador e o móbil con seguridade e autonomía.
Os cursos desenvolveranse en horario de mañá, de 9:00 a 13:00, e serán totalmente gratuítos, ofrecendo unha oportunidade real de acceso á formación dixital básica e avanzada para toda a veciñanza.
Desde o 1 de setembro comezarán os cursos máis demandados, que son os de iniciación á informática e manexo de teléfonos móbiles (Android e iPhone). Estes cursos están deseñados para persoas que nunca tiveron contacto coa tecnoloxía ou que queren aprender a facer chamadas, enviar mensaxes, usar WhatsApp, facer videoconferencias ou consultar a cita médica polo móbil. Ambos formativos terán unha duración ata finais de novembro.
Ademais, ata a última semana de novembro desenvolveranse tamén os cursos de ofimática (Word, Excel, PowerPoint), deseño gráfico dixital, Internet seguro, uso do correo electrónico e formación práctica con gafas de realidade virtual, impresión 3D e robótica
A programación pretende achegar a tecnoloxía á vida diaria das persoas adultas, nun ambiente amable, guiado e adaptado aos distintos niveis.
Certificación COMDIX – Competencias Dixitais de Galicia
En setembro abrirase tamén a convocatoria para a obtención da certificación oficial COMDIX da Xunta de Galicia, un título recoñecido que acredita o dominio de competencias dixitais. O exame de nivel iniciación será a finais de outubre e de nivel intermedio a finais de novembro.
Estes cursos preparatorios tamén serán gratuítos e impartiranse no propio centro.
As inscripcions
As persoas interesadas poden inscribirse na Casa da Mocidade do Concello de Moaña os luns, mércores e venres de 10:00 a 12:00 horas e tamén informarse a través da web oficial da rede CeMIT cemit.xunta.gal
Vía teléfónica poden chamar ao número: 616 804 107.