O único concelleiro do PSdeG de Moaña, Mario Rodríguez, vota a favor da investidura de Leticia Santos a pesar da súa maioría absoluta
O pleno de investidura do Concello de Moaña transcorreu sen sorpresas. Non debía de habelas tampouco porque a nacionalista Leticia Santos obtivo maioría absoluta nas urnas o pasado 28 de maio, por tanto tíñaa garantida. Con todo, e sorprendentemente, contou cun voto máis, o do único concelleiro do PSdeG, Mario Rodríguez, que preferiu levantar a man a favor de Santos.
Na bancada do PP, Javier Carro, tamén presentou a súa candidatura obtendo os votos dos seus compañeiros, seis en total, os mesmos que mantiña ata o de agora o PP.
O salón de plenos moañés tamén estivo repleto de público que acudiu a arroupar tanto á nova rexedora como tamén aos demais concelleiros da nova corporación local.
