As persoas interesadas deberán igualar ou superar os canos establecidos para cada un dos quioscos. Terán ata o 21 de abril. Por outro lado, o Concello avanza na tramitación para volver a sacar a licitación o Bar de Portocelo, despois da renuncia do adxudicatario.
A hostalaría vinculada á tempada estival sempre é un dos grandes atractivos que ten o verán en calquera zona de costa e por iso o Concello de Marín está traballando na xestión dos locais e servizos que dependen da administración pública.
Por unha banda, xa está aberta a licitación para as autorizacións de explotacións de servizos para este ano e ata 2028 nas praias do noso termpo municipal.
Falamos de quioscos de venda de xeados e refrescos e as súas terrazas, que ocupan un dominio público marítimo-terrestre con instalacións desmontables, que se habilitan entre o 1 de maio e o 31 de outubro de cada ano. Deste xeito, saen a licitación un quiosco en Portocelo e outro en Mogor de 39 metros cadrados, outro en Aguete de 27 m2, outro en Loira de 62 m2 e un no Santo de 16m2. Os canons anuais mínimos a aboar ao Concello para cada un dos lotes por anualidades, e que poden ser mellorados polos licitadores, son os seguintes:
- Portocelo: 1.560 euros (fianza de 975 euros)
- Mogor: 1.560 euros (fianza de 975 euros)
- Aguete: 1.080 euros (fianza de 675 euros)
- Loira: 2.480 euros (fianza de 1.550 euros)
- O Santo: 640 euros (fianza de 400 euros)
O abono total polas catro anualidades efectuarase por metades, debendo aboar o 50% con carácter previo á adxudicación da autorización nos 10 días hábiles seguintes á notificación do requerimiento da documentación necesaria, para despois proceder á adxudicación.
A presentación de ofertas realizarse telemáticamente a través da Plataforma de Contratación do Sector Público e o prazo estará aberto ata o 21 de abril de 2025. Neste portal é onde se poden consultar os pregos técnicos e administrativos de xeito íntegro.
O Bar de Portocelo, revisado e listo para abrir unha nova licitación
Por outro lado, a técnica municipal realizou esta semana a correspondente inspección do local de hostalaría de Portocelo do que a persoa que resultara adxudicataria da concesión presentou a renuncia. Unha vez comprobado que todo se atopaba en bo estado e cumprindo coa normativa, agora o Concello procederá a sacar de novo a licitación a explotación deste local para que así poida estar aberto de cara ao verán.