O apoio a PEMES transformadoras permite avanzar en tecnoloxía, trazabilidade e capacidade de exportación. Ademáis, as axudas ao sector pesqueiro e marisqueiro reforzan a profesionalización, a modernización e a competitividade da actividade
A Consellería do Mar salientou hoxe o amplo esforzo investidor que a Xunta está a desenvolver na comarca do Morrazo, un territorio clave pola súa intensa actividade pesqueira, marisqueira e transformadora. As actuacións impulsadas a través das distintas direccións xerais e de Portos de Galicia poñen de manifesto un compromiso continuo cun sector fundamental para o emprego e para a economía das vilas costeiras.
Dentro deste esforzo destaca o volume de axudas canalizadas nos últimos exercicios a través de programas destinados ás confrarías, á modernización organizativa, á formación de profesionais, á mellora da produción e da comercialización e á dinamización de proxectos colectivos que fortalecen o tecido mariñeiro. En total, o Goberno galego mobilizará máis de 440.000 euros en apoios ás confrarías de Cangas, Moaña, Bueu, Aldán-Hío e Marín ata 2026.
Estes recursos permiten reforzar capacidades nas entidades do sector, promover iniciativas de valorización de produtos e apoiar a continuidade de actividades vinculadas ao mar que sosteñen emprego directo e indirecto en toda a comarca. Unas axudas que se complementan coas destinadas ás Estratexias de Desenvolvemento Local Participativo (EDLP), que suporán un investimento que supera os 680.000 euros distribuídos en nove proxectos.
Por outra banda, a Consellería do Mar mantén unha liña estable de apoio a propietarios de embarcacións para a mellora das condicións de traballo, a eficiencia e a seguridade. A través destas axudas financiáronse actuacións destinadas á renovación de equipamentos obrigatorios, á mellora da eficiencia enerxética e á adaptación das embarcacións ás novas esixencias técnicas e ambientais. Unhas achegas que deixaron na comarca 3,6 millóns de euros en dezaoito iniciativas cun impacto directo na competitividade das frotas de baixura e altura asentadas no Morrazo, contribuíndo a manter a súa actividade en condicións óptimas e reducindo riscos nun dos oficios máis esixentes da economía galega.
No ámbito empresarial, destacan as axudas dirixidas a PEMES transformadoras e comercializadoras de produtos do mar, que permiten introducir melloras en innovación, tecnoloxía, calidade e adaptación a mercados cada vez máis competitivos. Empresas do Morrazo accederon a estes fondos para renovar liñas de produción, implementar ferramentas dixitais de trazabilidade, mellorar instalacións e avanzar na transición enerxética. En total, supuxeron máis de 1,4 millóns de euros. Estas actuacións consolidan o papel da comarca como espazo industrial de referencia no sector marítimo-pesqueiro e reforzan a súa capacidade para competir en mercados internacionais, xerando emprego estable e cualificado.
Portos de Galicia
O ente público Portos de Galicia continúa amosando un importante esforzo inversor na comarca. Así, nos últimos anos realizou actuacións de gran relevancia como a ampliación e mellora do porto de pasaxe de Cangas, unha das principais portas de entrada e saída por mar da comarca, fundamental para o transporte de persoas e tamén para a conectividade do territorio. Unha actuación que mobilizou 1,2 millóns de euros e que se complementou coa reposición de defensas e medios de amarre no porto pesqueiro, a substitución da cuberta da lonxa e a renovación dos pavimentos dos pantaláns e fingers, cunha investigación conxunta de 400.000 euros.
Este ano executouse a renovación e substitución da iluminación portuaria por luces LED, que reforza a seguridade e reduce o consumo enerxético das instalacións, e realizáronse melloras na marquesiña da Estación Marítima canguesa, actuacións valoradas en máis de 80.000 euros. De cara ao futuro, os orzamentos de Portos de Galicia contemplan importes destacados para actuacións en Cangas, Moaña e Bueu. No relativo a Cangas, recóllense investimentos de preto de 3 millóns de euros para o sector profesional portuario, mentres que en Bueu se destinará medio millón de euros para mellorar as condicións de traballo dos mariñeiros. Finalmente, en Moaña están previstas varias obras con carácter plurianual, destacando a rehabilitación do peirao mexilloeiro, cun investimento de 600.000 euros, e a reforma da nave de Tirán, cun orzamento de 350.000 euros por parte de Portos de Galicia.
En paralelo, o Goberno galego rematou xa a tramitación autonómica da reversión dos terreos portuarios, que permitirá aos concellos da comarca recuperar espazos estratéxicos para a súa integración urbana, ampliando oportunidades para novos usos públicos e contribuíndo a unha relación máis equilibrada entre porto e vila.
Deste xeito, a Xunta reafirma o seu compromiso co Morrazo, tanto a través do apoio directo ás entidades e empresas como mediante investimentos estruturais que melloran a vida laboral do sector e fortalecen o modelo económico vinculado ao mar. O conxunto destas actuacións consolida a comarca como un dos piares fundamentais da Galicia mariñeira e como un territorio clave na estratexia autonómica para garantir un sector sólido, competitivo e con futuro.