Adicam celebra o su 25 aniversario cunha obra colectiva na que participan 35 voluntarias que simboliza unión, a forza compartida e a esperanza das personas afectadas polo cancro de mama e xinecolóxico.
Quen estes días pasa pola rotonda dos Mexillóns, en Cangas, non pode evitar deter a mirada nunha parede que se transforma pouco a pouco. O gris habitual foi deixando paso a pinceladas de rosa e, con elas, á curiosidade de moitas persoas que se preguntaban que historia se estaba a escribir entre a Avenida de Vigo e a avenida de Bueu.
A resposta chegou aos poucos. Primeiro apareceron as cores, despois as formas e, finalmente, unha palabra que despexou as dúbidas: ADICAM.
A Asociación de Diagnosticadas de Cancro de Mama e Xinecolóxico decidiu celebrar o seu 25º aniversario deixando unha pegada permanente no corazón da vila. E fíxoo a través da arte, cun mural conmemorativo que busca converterse nun símbolo do camiño percorrido durante un cuarto de século acompañando, apoiando e dando visibilidade ás persoas afectadas pola enfermidade.
A obra leva a sinatura da artista Sheela Tato, encargada de dar forma a unha creación chea de significado, vida e esperanza. Pero este mural non pertence só á súa autora. Tamén é o resultado da participación activa das mulleres que forman parte da asociación e que, durante varios días, colaboran na súa elaboración deixando a súa propia marca sobre a parede.
Máis de 35 voluntarias pasarán por este espazo entre os días 18 e 21 de xuño, convertendo cada pincelada nun reflexo da esencia de Adicam: a unión, a solidariedade, a forza compartida e o compromiso coa vida.
A intervención artística continúa avanzando ao longo da fin de semana, mentres veciños e visitantes observan como a obra vai cobrando forma. Un proceso que, en certa maneira, tamén resume a historia da propia asociación: construída pouco a pouco, entre moitas mans e moitos corazóns.
Porque este mural é moito máis ca unha creación artística. É unha homenaxe ás persoas que formaron parte destes 25 anos de historia, un recoñecemento ao traballo realizado e unha mensaxe de esperanza que permanecerá visible para lembrar que, detrás de cada cor e de cada trazo, hai historias de superación, acompañamento e vida.